ઝારખંડ સરકારે રાજ્યમાં યોજાનારી વિધાનસભા ચૂંટણી પહેલા મહિલાઓને લઈને મોટી જાહેરાત કરી છે. સોમવારે મુખ્યમંત્રી હેમંત સોરેનની આગેવાની હેઠળની કેબિનેટે મૈયા સન્માન યોજના હેઠળ મળતી રકમને વધારીને 2500 રૂપિયા કરવાની મંજૂરી આપી છે.
હરિયાણા અને જમ્મુ-કાશ્મીરમાં ચૂંટણી પૂર્ણ થયા બાદ ઝારખંડમાં વિધાનસભા ચૂંટણી 2024ની તારીખોની જાહેરાત કરવામાં આવી છે. મંગળવારે ચૂંટણી પંચના મુખ્ય કમિશનર રાજીવ કુમારે જણાવ્યું હતું કે ઝારખંડમાં 81 વિધાનસભા બેઠકો માટે 13 અને 20 નવેમ્બર 2024ના રોજ મતદાન થશે, જ્યારે મતોની ગણતરી 23 નવેમ્બરે થશે. દરમિયાન ચૂંટણી પહેલા સોમવારે ઝારખંડની વર્તમાન સરકારે મહિલાઓ માટે મોટી જાહેરાત કરી છે.
મહિલાઓને દર મહિને 2500 રૂપિયા મળશે
ઝારખંડમાં મહિલાઓને તેમની આર્થિક મજબૂતી અને સશક્તિકરણ માટે દર મહિને 2500 રૂપિયાની સહાય રકમ આપવામાં આવશે. મુખ્યમંત્રી હેમંત સોરેનની આગેવાની હેઠળની કેબિનેટે પણ આ માટે મંજૂરી આપી દીધી છે. ઝારખંડ સરકારે રાજ્યમાં ચાલી રહેલી ‘મૈયા સન્માન યોજના’ હેઠળ આપવામાં આવતી રકમને 1,000 રૂપિયા પ્રતિ માસથી વધારીને 2,500 રૂપિયા પ્રતિ માસ કરવાની મંજૂરી આપી છે. સોમવારે આ નિર્ણય લેવામાં આવ્યો છે.
મૈયા સન્માન યોજના શું છે?
રાજ્ય સરકારે આ વર્ષે ઓગસ્ટમાં મૈયા સન્માન યોજના શરૂ કરી હતી. આ અંતર્ગત રાજ્યમાં 18 વર્ષથી વધુ ઉંમરની છોકરીઓ અને મહિલાઓને દર મહિને 1000 રૂપિયાની આર્થિક સહાય આપવામાં આવે છે. હાલમાં કુલ 50 લાખ મહિલાઓ આ યોજનાનો લાભ લઈ રહી છે. હવે આ યોજનાની રકમ વધારીને 2500 રૂપિયા કરવામાં આવી છે, જેનો લાભ લાભાર્થીઓને ડિસેમ્બર 2024થી મળશે. તેનાથી સરકારની આવક પર રૂ. 9000 કરોડનો બોજ પડશે.
તમને જણાવી દઈએ કે ભારતીય જનતા પાર્ટીએ પોતાના ઘોષણાપત્રમાં ગોગો દીદી યોજના હેઠળ ઝારખંડમાં 18 વર્ષથી વધુ ઉંમરની મહિલાઓને દર મહિને 2100 રૂપિયા આપવાનું વચન આપ્યું છે. જે બાદ ઝારખંડની વર્તમાન સરકારે મૈયા સન્માન યોજના હેઠળ મળેલી રકમમાં વધારો કરવાની મંજૂરી આપી છે. સરકારના આ નિર્ણયને રાજકારણ સાથે જોડવામાં આવી રહ્યો છે.
જાહેર થઇ ગઈ મહારાષ્ટ્ર-ઝારખંડની વિધાનસભા ચૂંટણીની તારીખો, જાણો કઈ તારીખે મતદાન? ક્યારે મતગણતરી
