Earthquake On Independence Day :15 ઓગસ્ટ, 1947ના રોજ ભારતને આઝાદી મળી હતી. પરંતુ, ભારતની આઝાદી સિવાય, 15મી ઓગસ્ટના દિવસને અન્ય એક મહત્વપૂર્ણ ઘટના માટે યાદ કરવામાં આવે છે. સ્વતંત્રતા દિવસના દિવસે દેશના એક ભાગમાં વિનાશક ભૂકંપ આવ્યો હતો, જેણે લગભગ 20 થી 30 હજાર લોકોના જીવ લીધા હતા. વિનાશક ભૂકંપમાં 4,800 થી વધુ લોકો માર્યા ગયા હતા. એકલા આસામમાં 1,500 થી વધુ મૃત્યુ નોંધાયા હતા, જ્યારે તિબેટમાં 3,300 મૃત્યુ નોંધાયા હતા. મીડિયા રિપોર્ટ્સમાં દાવો કરવામાં આવ્યો છે કે મૃત્યુઆંક 20 થી 30 હજારની આસપાસ છે.
8.7ની તીવ્રતાના ભૂકંપે તબાહી મચાવી હતી
15 ઓગસ્ટ, 1950ના રોજ દેશભરમાં આઝાદીના ત્રણ વર્ષ પૂર્ણ થયાની ઉજવણી કરવામાં આવી રહી હતી. તે જ સમયે, ભારતના ઉત્તર-પૂર્વીય રાજ્ય આસામમાં વિનાશક ભૂકંપ આવ્યો. ભૂકંપના આંચકા ભારતીય સમય અનુસાર સાંજે 7.39 કલાકે અનુભવાયા હતા. 8.7ની તીવ્રતાના આ ભૂકંપનું કેન્દ્ર મિશ્મી હિલ્સમાં હતું. તે સમયે તે જમીન પર નોંધાયેલો સૌથી શક્તિશાળી ભૂકંપ હતો. આ ભૂકંપે આસામ (ભારત) અને તિબેટ બંનેમાં તબાહી મચાવી હતી.
આસામ અને તિબેટમાં ભૂકંપ
એવું કહેવાય છે કે આસામ અને તિબેટમાં આવેલો ભૂકંપ એટલો ખતરનાક હતો કે મકાનો અને ઈમારતો જમીનદોસ્ત થઈ ગઈ હતી. આટલું જ નહીં પહાડો અને નદીઓ પર તેની ઘણી અસર થઈ હતી. આ વિનાશક ધરતીકંપથી પ્રકૃતિનું સંતુલન સંપૂર્ણપણે ખોરવાઈ ગયું હતું. આ નુકસાનનું મુખ્ય કારણ એ હતું કે ભૂકંપ ભારત અને તિબેટ વચ્ચેની મેકમોહન લાઇનની દક્ષિણે સ્થિત હતો. જેના કારણે બંને સેક્ટરને ભારે નુકસાન વેઠવું પડ્યું હતું.
આસામ-તિબેટનો ભૂકંપ 20મી સદીનો છઠ્ઠો સૌથી મોટો ભૂકંપ હતો.
આસામ-તિબેટનો ભૂકંપ 20મી સદીનો છઠ્ઠો સૌથી મોટો ભૂકંપ હોવાનું કહેવાય છે. ભૂસ્ખલનને કારણે અબોર પહાડીઓમાં આવેલા 70 ગામો નાશ પામ્યા હતા. એટલું જ નહીં ભૂસ્ખલનથી બ્રહ્મપુત્રાની ઉપનદીઓને પણ અસર થઈ હતી. સંપત્તિના નુકસાનની વાત કરીએ તો આસામમાં આવેલો આ ભૂકંપ 1897ના ભૂકંપ કરતા પણ વધુ ખતરનાક હતો. ભૂકંપ પછી નદીઓ વહેતી થવાને કારણે પૂર પણ આવી ગયા અને ટેકરીઓ પરથી રેતી, માટી, વૃક્ષો અને તમામ પ્રકારનો કાટમાળ નીચે પડવા લાગ્યો. આ ભૂકંપના કારણે આસામને લાંબા સમય સુધી સમસ્યાઓનો સામનો કરવો પડ્યો હતો.
