Assam: આસામના લખીમપુરમાં મોબાઈલ ચોરીમાં ઝડપાયેલા એક આરોપીનું પોલીસ કસ્ટડીમાં મોત થયું છે. આરોપીના મોત બાદ લખીમપુરમાં તણાવનું વાતાવરણ ફેલાઈ ગયું હતું. ખેલમતી વિસ્તારમાં સ્થાનિક લોકોએ રસ્તા પર ઉતરીને વિરોધ શરૂ કર્યો હતો. આ ઘટનાના સંદર્ભમાં બે પોલીસકર્મીઓને સસ્પેન્ડ કરવામાં આવ્યા છે.
પોલીસ સ્ટેશનમાં આરોપીનું મોત
મોબાઈલ ફોન અને અન્ય ઈલેક્ટ્રોનિક ઉપકરણોની ચોરીના સંબંધમાં બુધવારે ચાર લોકોની ધરપકડ કરવામાં આવી હતી. લખીમપુરના અધિક પોલીસ અધિક્ષક (ASP) એલકે ડેકાએ જણાવ્યું કે આરોપી પોલીસ સ્ટેશનની અંદર ખુરશી પર બેઠો હતો અને અચાનક નીચે પડી ગયો. તેને તાત્કાલિક સિવિલ હોસ્પિટલમાં લઈ જવામાં આવ્યો હતો, જ્યાં ડોક્ટરોએ તેને મૃત જાહેર કર્યો હતો.
પોલીસ સ્ટેશન ઈન્ચાર્જ સસ્પેન્ડ
એએસપીએ કહ્યું કે ઘટના સમયે દીપાંકર ચાંગમાઈ પોલીસ સ્ટેશનના ઈન્ચાર્જ હતા અને તેમની સાથેના અન્ય પોલીસકર્મીઓને સસ્પેન્ડ કરવામાં આવ્યા હતા. તેમણે વધુમાં કહ્યું કે, “આ ઘટના પોલીસ સ્ટેશનની અંદર બની હતી, તેથી ASP રેન્કના અધિકારીઓ મામલાની તપાસ કરશે.” આ ઘટનાના વિરોધમાં સવારથી જ પોલીસ સ્ટેશન સામે ભારે ભીડ એકત્ર થઈ ગઈ હતી. વિસ્તારમાં તણાવનો માહોલ છે. સ્થિતિને શાંત કરવા માટે ઉચ્ચ પોલીસ અધિકારીઓ ઘટનાસ્થળે પહોંચી ગયા હતા.
