રાષ્ટ્રીય સ્વયંસેવક સંઘ (RSS) એ લઘુમતી હિંદુઓ વિરુદ્ધ ચાલી રહેલી હિંસા પર ચિંતા વ્યક્ત કરી છે. સંઘના અખિલ ભારતીય પ્રચાર પ્રમુખ સુનીલ આંબેકરે નાગપુરમાં આયોજિત એક કાર્યક્રમમાં કહ્યું કે કેન્દ્ર સરકારે બાંગ્લાદેશમાં હિંદુઓ પર થતા અત્યાચારને રોકવા માટે નક્કર પગલાં લેવા જોઈએ. આ મુદ્દાને વાતચીત દ્વારા ઉકેલી શકાય છે, પરંતુ જો વાતચીત નિષ્ફળ જાય તો હિંસા રોકવા માટે અન્ય કોઈ ઉકેલ શોધવો જ જોઈએ. તેમણે કહ્યું કે, બાંગ્લાદેશમાં જે થઈ રહ્યું છે તેનાથી દરેક હિંદુએ ગુસ્સે થવું જોઈએ. બાંગ્લાદેશમાં લઘુમતી હિંદુ, બૌદ્ધ, જૈન અને અન્ય સમુદાયો પર થયેલા હુમલાની નિંદા કરવા માટે સકલ હિન્દુ સમાજ વતી આ કાર્યક્રમનું આયોજન કરવામાં આવ્યું હતું.
સન્યાસી કેસમાં જામીન અરજી પર સુનાવણી સ્થગિત
દરમિયાન, ચટગાંવ કોર્ટમાં હિંદુ સાધુ ચિન્મય કૃષ્ણ દાસની જામીન અરજી પરની સુનાવણી ફરી મોકૂફ રાખવામાં આવી હતી. બુધવારે અરજીને સુનાવણી માટે આગળ લાવવાની અપીલ ફગાવી દેવામાં આવી હતી. સુપ્રીમ કોર્ટના વરિષ્ઠ વકીલ રવિન્દ્ર ઘોષે આ અરજી દાખલ કરી હતી, જેનો કોર્ટમાં હાજર વકીલોએ વિરોધ કર્યો હતો.
યુનુસ ભારત સરકાર સાથે શેખ હસીના વિશે વાત કરશે
બાંગ્લાદેશની વચગાળાની સરકારના વડા મુહમ્મદ યુનુસે કહ્યું કે સરકાર ટૂંક સમયમાં પૂર્વ વડાપ્રધાન શેખ હસીનાના પ્રત્યાર્પણ માટે ભારત સરકાર સાથે સત્તાવાર રીતે વાત કરશે. બાંગ્લાદેશને આશા છે કે ભારત બાંગ્લાદેશની ન્યાયિક પ્રક્રિયાને અનુસરશે અને હસીનાનું પ્રત્યાર્પણ કરશે. કાનૂની નિષ્ણાત ટોબી કેડમેનનું કહેવું છે કે જો ભારત હસીનાનું પ્રત્યાર્પણ નહીં કરે તો બાંગ્લાદેશ ઈન્ટરનેશનલ ક્રિમિનલ કોર્ટ (ICC)ની મદદ લઈ શકે છે.
