પુણેની એક કોર્ટે કોંગ્રેસ નેતા અને રાયબરેલીના સાંસદ રાહુલ ગાંધીને સમન્સ જારી કર્યા છે. આ સમન્સ સ્વતંત્રતા સેનાની વિનાયક દામોદર સાવરકરના પૌત્ર દ્વારા દાખલ કરવામાં આવેલા માનહાનિના કેસના સંદર્ભમાં જારી કરવામાં આવ્યું છે. સાવરકરના પૌત્ર સાત્યકી સાવરકરે નોંધાવેલી ફરિયાદમાં જણાવ્યું હતું કે રાહુલ ગાંધીએ ગયા વર્ષે યુનાઇટેડ કિંગડમમાં એક કાર્યક્રમ દરમિયાન સાવરકર વિરુદ્ધ વાંધાજનક ટિપ્પણી કરી હતી.
કોર્ટે રાહુલ ગાંધીને 23 ઓક્ટોબરે હાજર થવાનો આદેશ આપ્યો છે. એપ્રિલ 2023માં સત્યકી સાવરકરે કેસ દાખલ કર્યો હતો. સાત્યકીએ પુણેની મેજિસ્ટ્રેટ કોર્ટમાં રાહુલ ગાંધી સામે માનહાનિની ફરિયાદ દાખલ કરી હતી, જેમાં તેણે આરોપ લગાવ્યો હતો કે ગાંધીએ 5 માર્ચ, 2023ના રોજ લંડનમાં એક કાર્યક્રમ દરમિયાન સાવરકર વિશે અપમાનજનક ટિપ્પણી કરી હતી.
સત્યની ફરિયાદમાં જણાવાયું છે કે, “રાહુલ ગાંધીએ ઘણા વર્ષોથી વારંવાર સાવરકરનું અપમાન અને બદનામ કર્યું છે.” તેમણે એવો પણ દાવો કર્યો હતો કે ગાંધીએ જાણીજોઈને સાવરકર પર ખોટા આક્ષેપો કર્યા હતા, જેનાથી તેમની પ્રતિષ્ઠાને નુકસાન થયું હતું.
તદુપરાંત, નાસિક કોર્ટે તાજેતરમાં રાહુલ ગાંધીને સાવરકર વિરુદ્ધ તેમના દ્વારા કરવામાં આવેલી વાંધાજનક ટિપ્પણીઓ સાથે જોડાયેલા એક અલગ માનહાનિના કેસમાં પણ સમન્સ પાઠવ્યું છે. આ કેસમાં ફરિયાદી એક એનજીઓના ડાયરેક્ટર છે. તેમણે આરોપ લગાવ્યો છે કે રાહુલ ગાંધીએ નવેમ્બર 2022માં હિંગોલીમાં પ્રેસ કોન્ફરન્સ અને ભાષણ દરમિયાન સાવરકરની પ્રતિષ્ઠાને નુકસાન પહોંચાડ્યું હતું.
આ પણ વાંચો – હરિયાણામાં ભાજપને મોટો ફટકો, ભાજપ માટે વોટ માંગી રહેલા અશોક તંવર કોંગ્રેસમાં પરત ફર્યા
