Ayodhya : રામ મંદિરના નિર્માણ અને ખાસ કરીને પ્રાણ પ્રતિષ્ઠા પછીની ઉજવણીને કારણે અયોધ્યા શહેરનો રંગ બદલાઈ ગયો છે. હવે અયોધ્યામાં નેશનલ સિક્યુરિટી ગાર્ડ (NSG) સેન્ટર બનાવવાની યોજના પર કામ શરૂ થઈ ગયું છે. આ અંગેની ફાઇલ ગૃહ મંત્રાલયમાં આગળ વધી છે.
NSG કેન્દ્રનું નેતૃત્વ DIG અને IG રેન્કના અધિકારી કરે છે
માહિતી અનુસાર, સરકાર DIG અને IG રેન્કના અધિકારીઓના નેતૃત્વમાં અયોધ્યામાં NSG સેન્ટર બનાવવાની યોજના બનાવી રહી છે. આ NSG કેન્દ્રમાં બોમ્બ ડિસ્પોઝલ સ્ક્વોડ, એન્ટી સેબોટેજ ટીમ, એન્ટી હાઇજેકિંગ ટીમ, ક્વિક એક્શન ટીમ, K9 ડોગ સ્કવોડ સહિત તમામ આધુનિક સાધનો હાજર રહેશે.
આ પહેલા પણ અયોધ્યામાં આતંકી હુમલો થયો છે
વાસ્તવમાં અયોધ્યા પહેલાથી જ ઘણી સંવેદનશીલ રહી છે. અહીં પહેલા પણ આતંકવાદી હુમલા થયા છે પરંતુ સુરક્ષા દળોની સતર્કતાને કારણે આતંકવાદીઓના મનસૂબા સફળ થઈ શક્યા નથી. રામ મંદિરના નિર્માણ બાદ રામભક્તોની ભીડને જોતા અહીં કડક સુરક્ષા વ્યવસ્થા કરવામાં આવી છે. હવે કેન્દ્ર અયોધ્યામાં NSG કેન્દ્ર સ્થાપવાની યોજના ધરાવે છે.
NSG શું છે?
એનએસજીની રચના આતંકવાદ વિરોધી ગતિવિધિઓ માટે કરવામાં આવી હતી. વર્ષ 1984માં કેન્દ્રીય કેબિનેટે NSGની રચના કરવાનો નિર્ણય લીધો હતો. આ માટે 1986માં સંસદમાં એક બિલ રજૂ કરવામાં આવ્યું હતું અને તેને 22 સપ્ટેમ્બર, 1986ના રોજ રાષ્ટ્રપતિની મંજૂરી મળી હતી. તે દિવસથી NSG ઔપચારિક રીતે અસ્તિત્વમાં આવ્યું.
