ઉત્તર કોરિયાના તાનાશાહ કિમ જોંગે મોટી માત્રામાં પરમાણુ હથિયાર બનાવવાનો આદેશ આપ્યો છે. ઉત્તર કોરિયાએ પહેલીવાર પોતાની પરમાણુ ફેક્ટરીની તસવીર શેર કરી છે. દેશના સરકારી મીડિયાએ શુક્રવારે અહેવાલ આપ્યો છે કે કિમ જોંગે તે વિસ્તારની મુલાકાત લીધી છે જ્યાં મોટા પ્રમાણમાં પરમાણુ હથિયારો બનાવવામાં આવી રહ્યા છે. ઉત્તર કોરિયાનું મુખ્ય પરમાણુ ઉત્પાદન કેન્દ્ર યોંગબ્યોનમાં આવેલું છે, પરંતુ કિમ જોંગે મુલાકાત લીધેલી ફેક્ટરી આ વિસ્તારમાં છે કે નહીં તે અંગે ખુલાસો કરવામાં આવ્યો નથી. હાલમાં, ઉત્તર કોરિયાની યુરેનિયમ સંવર્ધન સુવિધા વિશે આ પ્રથમ જાહેર ખુલાસો હોવાનું કહેવાય છે.
નિષ્ણાંતોનું માનવું છે કે યુરેનિયમ સંવર્ધન અંગે આ પ્રકારનું જાહેર ખુલાસો અમેરિકા અને તેના સહયોગી દેશો પર દબાણ લાવવાનો એક માર્ગ હોઈ શકે છે. નિષ્ણાતોએ કહ્યું કે ઉત્તર કોરિયાના મીડિયાએ જે રીતે પરમાણુ સંવર્ધન કેન્દ્રના ફોટા શેર કર્યા છે, તેનાથી વિશ્વને ઉત્તર કોરિયાના પરમાણુ સંવર્ધનની હદનો અંદાજ કાઢવામાં મદદ મળી શકે છે.
કિમ જોંગે પરમાણુ ક્ષમતા વધારવાનો આદેશ આપ્યો છે
કોરિયન સેન્ટ્રલ ન્યૂઝ એજન્સી (KCNA) એ તેના અહેવાલમાં જણાવ્યું છે કે પરમાણુ સંવર્ધન સ્થળ પર પહોંચ્યા પછી કિમ જોંગે ‘પરમાણુ ઊર્જા ક્ષેત્રની અદભૂત તકનીકી શક્તિ પર સંતોષ વ્યક્ત કર્યો.’ સમાચાર એજન્સીએ જણાવ્યું કે આ સમયગાળા દરમિયાન કિમ જોંગે યુરેનિયમ સંવર્ધન આધારના કંટ્રોલ રૂમ અને એક બાંધકામ સ્થળની મુલાકાત લીધી. તેમણે શસ્ત્રો બનાવવાની ક્ષમતા વધારવાનો આદેશ આપ્યો છે.
કિમ જોંગ પાસે શસ્ત્રોની તસવીરો જોવા મળી
ઉત્તર કોરિયાના સરકારી મીડિયા દ્વારા જાહેર કરવામાં આવેલી તસવીરોમાં જોઈ શકાય છે કે કિમ જોંગ જે જગ્યાએ ચાલી રહ્યા છે ત્યાં ગ્રે ટ્યુબની લાંબી હારમાળા છે. હાલમાં કિમ જોંગે આ સ્થળની મુલાકાત ક્યારે લીધી અને તે ક્યાં સ્થિત છે તે સમાચાર એજન્સી દ્વારા જણાવવામાં આવ્યું નથી. KCNAએ અહેવાલ આપ્યો છે કે કિમ જોંગે સ્વરક્ષણ માટે પરમાણુ હથિયારોની સંખ્યામાં ઝડપથી વધારો કરવાનો આદેશ આપ્યો છે. કિમ જોંગ આ મુદ્દે નિવેદન આપતા રહે છે.
આ પણ વાંચો – પાકિસ્તાનમાં સામ સામે કેમ આવી ગયા પોલીસ અને સેના, શું બાંગ્લાદેશ સાથે જોડાયેલું છે કનેક્શન ?
