ગુરુવારે વર્જિનિયાના એક લશ્કરી બેઝ પર એર શોની તૈયારી કરતી વખતે એક વિમાન ક્રેશ થયું. આ અકસ્માતમાં વિમાનમાં સવાર પાયલોટનું મોત નીપજ્યું હતું. આર્મી બેઝના અધિકારીઓએ એક પ્રેસ રિલીઝમાં જણાવ્યું હતું કે હેમ્પટનમાં જોઈન્ટ બેઝ લેંગલી-યુસ્ટિસ પર લેન્ડિંગ કરતી વખતે વિમાન ક્રેશ થયું હતું.
એર શોની તૈયારી દરમિયાન અકસ્માત થયો હતો
વિમાનના પાયલોટની હજુ સુધી ઓળખ થઈ નથી. પાયલોટ એર પાવર ઓવર હેમ્પટન રોડ્સ એર શો માટે તૈયારી કરી રહ્યો હતો, જે આ સપ્તાહના અંતે બેઝ પર યોજાવાનો હતો.
“આજે આપણે આપણા વાયુસેના પરિવારના એક મિત્રને ગુમાવ્યો,” જોઈન્ટ બેઝ લેંગલી-યુસ્ટિસના કમાન્ડર કર્નલ મેથ્યુ ઓલ્ટમેને એક નિવેદનમાં જણાવ્યું. “અમારી સમગ્ર JBLE ટીમ વતી, હું પાઇલટના પરિવાર અને મિત્રો પ્રત્યે અમારી ઊંડી સંવેદના વ્યક્ત કરવા માંગુ છું.”
અકસ્માતની તપાસ ચાલી રહી છે
“MX એરક્રાફ્ટ MXS સાથે થયેલા અકસ્માતની તપાસ ચાલુ છે,” નેશનલ ટ્રાન્સપોર્ટેશન સેફ્ટી બોર્ડે X પરની એક પોસ્ટમાં જણાવ્યું હતું. MX એરક્રાફ્ટ વેબસાઇટ અનુસાર, MXS એક સિંગલ-સીટ એરક્રાફ્ટ છે.
તમને જણાવી દઈએ કે, જે બેઝ પર અકસ્માત થયો તે આર્મીનો ફોર્ટ યુસ્ટિસ અને લેંગલી એરફોર્સ બેઝ છે, જે ચેસાપીક ખાડીના દક્ષિણપશ્ચિમ કિનારા પાસે સ્થિત છે. આ સ્થાપન F-22 રેપ્ટર ફાઇટર એરક્રાફ્ટના સ્ક્વોડ્રનનું ઘર છે. તેમાંથી એકે 2023 માં એટલાન્ટિક ઉપર ચીની જાસૂસી ફુગ્ગાને તોડી પાડ્યો હતો.
