ખાદ્ય ચીજવસ્તુઓના ભાવ ઘટવાના કારણે છૂટક મોંઘવારી દરમાં ઘટાડો થયો છે. સોમવારે જારી કરાયેલા આંકડા અનુસાર, જાન્યુઆરીમાં છૂટક ફુગાવો 5.1% હતો. આ ત્રણ મહિનામાં તેનું સૌથી નીચું સ્તર છે. ડિસેમ્બર મહિનામાં તે 5.69%ની 4 મહિનાની ઊંચી સપાટીએ હતો.
કન્ઝ્યુમર પ્રાઇસ ઇન્ડેક્સ (CPI) આધારિત ફુગાવો એક વર્ષ અગાઉના સમાન સમયગાળામાં 6.52% હતો. ઓગસ્ટ 2023માં તે 6.83%ના ઉચ્ચ સ્તરે પહોંચ્યો હતો. રિઝર્વ બેંક ઓફ ઈન્ડિયા 2% ના તફાવત સાથે છૂટક ફુગાવો 4% પર રાખવાની જવાબદારી ધરાવે છે.
કઈ-કઈ ચીજવસ્તુઓના ભાવ ઘટ્યાઃ છૂટક મોંઘવારી ઘટવાનું મુખ્ય કારણ ખાદ્ય ચીજવસ્તુઓના ભાવમાં થયેલો ઘટાડો છે. જાન્યુઆરીમાં ખાદ્ય ફુગાવો 8.30 ટકા હતો. ડિસેમ્બરમાં તે 9.53 ટકા હતો. અનાજ અને સંબંધિત ઉત્પાદનોનો ફુગાવાનો દર ઘટીને 7.83 ટકા થયો છે, જે ડિસેમ્બરમાં 9.93 ટકા હતો.
મસાલાનો મોંઘવારી દર ડિસેમ્બરમાં 19.69 ટકાથી ઘટીને 16.36 ટકા પર આવી ગયો છે. એ જ રીતે ફળોનો મોંઘવારી દર પણ ઘટીને 8.65 ટકા થયો છે, જે ડિસેમ્બરમાં 11.14 ટકા હતો.
શાકભાજી અને કઠોળમાં થોડી રાહત: શાકભાજી અને કઠોળના ફુગાવાના દરમાં થોડો ઘટાડો થયો છે, પરંતુ તે હજુ પણ ચિંતાનું કારણ છે. કઠોળનો ફુગાવો જાન્યુઆરીમાં 19.54 ટકા હતો જે ડિસેમ્બરમાં 20.73 ટકા હતો. એ જ રીતે, શાકભાજીનો ફુગાવો પણ ડિસેમ્બરમાં 27.64 ટકાથી ઘટીને 27.03 ટકા થયો છે.
છેલ્લા છ મહિનામાં ફુગાવાનો ટ્રેન્ડ
- જાન્યુઆરી 5.1 ટકા
- ડિસેમ્બર 5.69 ટકા
- નવેમ્બર 5.55 ટકા
- ઓક્ટોબર 6.61 ટકા
- સપ્ટેમ્બર 6.62 ટકા
- ઓગસ્ટ 6.83 ટકા
