શુક્રવારે એટલે કે હોળીના દિવસે દિલ્હીમાં વરસાદને કારણે, રાષ્ટ્રીય રાજધાની ક્ષેત્રમાં હવામાનની પેટર્ન બદલાઈ ગઈ છે. NCRમાં ઝરમર ઝરમર અને ઠંડા પવનોએ હવામાનને ખુશનુમા બનાવ્યું હતું, જેના કારણે તાપમાનમાં ઘટાડો થયો છે. આગામી 2 થી 3 દિવસ સુધી આવું જ હવામાન રહેવાની ધારણા છે.
હવામાન વિભાગે રવિવારે સામાન્ય રીતે વાદળછાયું આકાશ અને હળવો વરસાદ કે ઝરમર વરસાદ રહેવાની આગાહી કરી છે. હવામાન વિભાગના જણાવ્યા અનુસાર, રવિવારે મહત્તમ અને લઘુત્તમ તાપમાન અનુક્રમે 32 ડિગ્રી સેલ્સિયસ અને 17 ડિગ્રી સેલ્સિયસની આસપાસ રહેવાની શક્યતા છે.
ગરમીથી રાહત કેટલો સમય રહેશે?
17 અને 18 માર્ચે દિલ્હીમાં ભારે પવન ફૂંકાશે. ત્યારબાદ દિલ્હીમાં ગરમીનો કહેર વધશે. હવામાન વિભાગના જણાવ્યા અનુસાર, ૧૯ માર્ચથી દિવસ દરમિયાન તાપમાનમાં ઝડપથી વધારો થવાની શક્યતા છે. ૧૯ થી ૨૧ માર્ચ દરમિયાન મહત્તમ તાપમાન ૩૪ થી ૩૬ ડિગ્રી વચ્ચે રહેવાની શક્યતા છે. જ્યારે લઘુત્તમ તાપમાન ૧૮ થી ૧૯ રહેવાની આગાહી છે.
શનિવારે દિલ્હીમાં મહત્તમ તાપમાન 33 ડિગ્રી સેલ્સિયસ નોંધાયું હતું, જે આ સિઝનના સરેરાશ તાપમાન કરતાં 4.1 ડિગ્રી વધારે છે. હવામાન વિભાગના જણાવ્યા અનુસાર, લઘુત્તમ તાપમાન ૧૮.૭ ડિગ્રી સેલ્સિયસ હતું. જ્યારે ભેજનું સ્તર 62 થી 50 ટકાની વચ્ચે રહ્યું. IMD એ જણાવ્યું હતું કે શુક્રવાર દિલ્હીમાં આ વર્ષનો સૌથી ગરમ દિવસ હતો, જેમાં મહત્તમ તાપમાન 36.2 ડિગ્રી સેલ્સિયસ નોંધાયું હતું, જે સામાન્ય કરતા 7.3 ડિગ્રી વધારે હતું.
3 વર્ષમાં શ્રેષ્ઠ AQI
કેન્દ્રીય પ્રદૂષણ નિયંત્રણ બોર્ડ (CPCB) અનુસાર, સાંજે 6 વાગ્યે દિલ્હીનો હવા ગુણવત્તા સૂચકાંક (AQI) 84 હતો, જે ‘સંતોષકારક’ શ્રેણીમાં આવે છે. કમિશન ફોર એર ક્વોલિટી મેનેજમેન્ટ (CAQM) અનુસાર, શનિવારે દિલ્હીમાં છેલ્લા ત્રણ વર્ષમાં 1 જાન્યુઆરીથી 15 માર્ચ વચ્ચેના કોઈપણ દિવસ કરતાં સૌથી સ્વચ્છ હવા ગુણવત્તા હતી. આ વર્ષ 2025નો પહેલો ‘સંતોષકારક’ AQI દિવસ હતો. CAQM અનુસાર, 2020 પછી 5 વર્ષમાં પહેલી વાર માર્ચમાં દિલ્હીનો AQI ‘સંતોષકારક’ શ્રેણીમાં રહ્યો છે.
શૂન્ય અને 50 ની વચ્ચેનો AQI ‘સારું’, 51-100 ‘સંતોષકારક’, 101-200 ‘મધ્યમ’, 201-300 ‘નબળું’, 301-400 ‘ખૂબ જ ખરાબ’ અને 401-500 ‘ગંભીર’ ગણવામાં આવે છે.
