નાશિક જિલ્લા અદાલતે ગુરુવારે મહારાષ્ટ્રના કૃષિ મંત્રી માણિકરાવ કોકાટે અને તેમના ભાઈ સુનીલ કોકાટેને ૧૯૯૫ના બનાવટી અને છેતરપિંડીના કેસમાં બે વર્ષની જેલની સજા ફટકારી છે. માણિકરાવ કોકાટે વિરુદ્ધ કેસ ભૂતપૂર્વ મંત્રી તુકારામ દિઘોલે દ્વારા દાખલ કરવામાં આવ્યો હતો, જેમણે તેમના પર દસ્તાવેજો બનાવટી બનાવવા અને છેતરપિંડી કરવાનો આરોપ મૂક્યો હતો. આરોપોના આધારે, ભારતીય દંડ સંહિતા (IPC) ની કલમ 420 (છેતરપિંડી), 465 (બનાવટી), 471 (બનાવટી દસ્તાવેજોનો ઉપયોગ) અને 47 હેઠળ કેસ નોંધવામાં આવ્યો હતો.
માણિકરાવ કોકાટે હાઇકોર્ટમાં અપીલ કરશે
નાસિક જિલ્લા કોર્ટે રાષ્ટ્રવાદી કોંગ્રેસ પાર્ટી (NCP) ના અજિત પવાર જૂથના નેતા માણિકરાવ કોકાટે પર 50,000 રૂપિયાનો દંડ પણ ફટકાર્યો છે. મળતી માહિતી મુજબ, પોતાના ધારાસભ્ય પદ અને મંત્રી પદ બચાવવા માટે, માણિકરાવ કોકાટે આજે નાશિક જિલ્લા કોર્ટના નિર્ણય સામે હાઇકોર્ટમાં અરજી દાખલ કરશે. જો હાઈકોર્ટ તેમની સજા પર રોક લગાવે છે, તો તેમના ધારાસભ્ય અને મંત્રી પદ બચી શકે છે, નહીં તો તેમને ગેરલાયક ઠેરવી શકાય છે.
શું છે આખો મામલો?
આ કેસ ૧૯૯૫ અને ૧૯૯૭ વચ્ચેના સમયગાળાના છે. માણિકરાવ કોકાટે અને તેમના ભાઈ સુનીલ કોકાટેને સરકારી આવાસ યોજનાઓ હેઠળ ફ્લેટ મળ્યા હતા. તેમણે દાવો કર્યો હતો કે તેમની આવક ઓછી છે અને તેમની પાસે પહેલાથી ઘર નથી. આ આધારે, તેને સરકારી યોજના હેઠળ આ ફ્લેટ મળ્યા. પરંતુ બાદમાં અધિકારીઓએ આ મામલે અનિયમિતતાઓની ફરિયાદ કરી.
૧૯૯૫માં, માણિકરાવ કોકાટે પર ખોટા દસ્તાવેજો અને છેતરપિંડીનો આરોપ મૂકવામાં આવ્યો હતો. આ મામલે પૂર્વ મંત્રી તુકારામ દિઘોલેએ અરજી દાખલ કરી હતી. આ ગુનો નાસિકના સરકારવાડા પોલીસ સ્ટેશનમાં નોંધવામાં આવ્યો હતો. આ કેસ ૧૯૯૭ થી કોર્ટમાં ચાલી રહ્યો હતો અને હવે તેનો નિર્ણય આવી ગયો છે.
આ કેસમાં ચાર લોકોને આરોપી બનાવવામાં આવ્યા હતા
આ કેસમાં કુલ ચાર આરોપી હતા, જેમાં માણિકરાવ કોકાટે, તેમના ભાઈ અને બે અન્યનો સમાવેશ થાય છે. જોકે, બાકીના બે આરોપીઓને કોર્ટે કોઈ સજા ફટકારી નથી. પરંતુ માણિકરાવ કોકાટે અને તેમના ભાઈને બે વર્ષની જેલ અને 50,000 રૂપિયા દંડની સજા ફટકારવામાં આવી છે.
