ઔરંગઝેબની કબર હટાવવા અંગે નાગપુરમાં થયેલા વિરોધ પ્રદર્શનો અચાનક હિંસક બની ગયા. દરમિયાન, મહારાષ્ટ્ર સરકારે હવે હિંસાના મુખ્ય આરોપી ફહીમ ખાન સામે કાર્યવાહી કરી છે. આજે ફહીમ ખાનના ઘરે બુલડોઝરથી કાર્યવાહી કરવામાં આવી છે. ફહીમ ખાન પર નાગપુર હિંસાનો માસ્ટરમાઈન્ડ હોવાનો આરોપ છે. હાલમાં તે પોલીસ કસ્ટડીમાં છે.
૧૭ માર્ચે નાગપુરમાં હિંસા થઈ હતી. પોલીસે માઈનોરિટી ડેમોક્રેટિક પાર્ટી (MDP)ના નેતા ફહીમ ખાન સહિત ૧૦૦ થી વધુ લોકોની ધરપકડ કરી છે. સૂત્રોએ જણાવ્યું હતું કે થોડા દિવસો પહેલા નાગપુર મ્યુનિસિપલ કોર્પોરેશને પણ ખાનને નોટિસ ફટકારી હતી. નાગપુર મ્યુનિસિપલ કોર્પોરેશને તેમને ગેરકાયદેસર બાંધકામ જાતે દૂર કરવા માટે 24 કલાકનો સમય આપ્યો હતો, જે આજે પૂર્ણ થયો.
ઘર પત્નીના નામે નોંધાયેલું છે
સૂત્રોના જણાવ્યા અનુસાર, યશોધરા નગર વિસ્તારમાં સંજય બાગ કોલોનીમાં આવેલું આ ઘર ફહીમ ખાનની પત્નીના નામે નોંધાયેલું છે. એમડીપી શહેર પ્રમુખ ફહીમ ખાન હાલમાં જેલમાં છે. છત્રપતિ સંભાજીનગરમાં ઔરંગઝેબની કબર દૂર કરવાની માંગણી સાથે વિશ્વ હિન્દુ પરિષદ (VHP) ના નેતૃત્વમાં થયેલા વિરોધ પ્રદર્શન દરમિયાન ધાર્મિક શિલાલેખોવાળી શીટ સળગાવી દેવામાં આવી હોવાની અફવા ફેલાતા 17 માર્ચે હિંસા ફાટી નીકળી હતી.
#WATCH | Maharashtra: Police in Nagpur arrive at the residence of Nagpur violence accused Faheem Khan, with a bulldozer. pic.twitter.com/pJenvIVcZu
— ANI (@ANI) March 24, 2025
નાગપુર હિંસામાં પોલીસકર્મીઓ ઘાયલ થયા
આ અથડામણોના પરિણામે શહેરના ઘણા ભાગોમાં વ્યાપક પથ્થરમારો અને આગચંપી થઈ, જેમાં ત્રણ ડેપ્યુટી કમિશનર ઓફ પોલીસ-કક્ષાના અધિકારીઓ સહિત 33 પોલીસકર્મીઓ ઘાયલ થયા.
મુખ્યમંત્રી દેવેન્દ્ર ફડણવીસે શનિવારે કહ્યું,
હિંસા દરમિયાન નુકસાન પામેલી મિલકતોની કિંમત તોફાનીઓ પાસેથી વસૂલ કરવામાં આવશે અને જો ચુકવણી ન કરવામાં આવે તો, તેમની મિલકતો જપ્ત કરવામાં આવશે અને નુકસાનની ભરપાઈ કરવા માટે વેચવામાં આવશે. મુખ્યમંત્રીએ બે દિવસ પહેલા જ કહ્યું હતું કે ‘જો કાયદો પરવાનગી આપશે તો બુલડોઝર ચાલશે.’
મ્યુનિસિપલ કોર્પોરેશન દ્વારા ઘરનું નિરીક્ષણ કરવામાં આવ્યું હતું
20 માર્ચે, મ્યુનિસિપલ અધિકારીઓએ ઘરનું નિરીક્ષણ કર્યું હતું અને મહારાષ્ટ્ર રિજનલ એન્ડ ટાઉન પ્લાનિંગ એક્ટ, 1966 ના ઉલ્લંઘનનો ઉલ્લેખ કર્યો હતો. અધિકારીઓનું કહેવું છે કે આ ઘર માટે કોઈ બિલ્ડિંગ પ્લાન મંજૂર કરવામાં આવ્યો ન હતો, જેના કારણે તે ગેરકાયદેસર બાંધકામની શ્રેણીમાં આવે છે.
