Navneet Rana : સંસદમાં શપથ ગ્રહણ સમારોહ દરમિયાન AIMIM સાંસદ અસદુદ્દીન ઓવૈસી દ્વારા ‘જય પેલેસ્ટાઈન’ના નારા લગાવવાને લઈને વિરોધ શરૂ થઈ ગયો છે. અમરાવતીના પૂર્વ સાંસદ નવનીત રાણાએ રાષ્ટ્રપતિને પત્ર લખીને ઓવૈસીનું સંસદ સભ્યપદ રદ કરવાની માંગ કરી છે.
નવનીત રાણા દ્વારા લખવામાં આવેલા પત્ર અનુસાર, ઓવૈસીએ તેમના સાંસદ શપથ ગ્રહણ સમારોહ દરમિયાન ભારતને બદલે અન્ય રાષ્ટ્ર પ્રત્યે વફાદારી દર્શાવી હતી. તેણે ‘જય પેલેસ્ટાઈન’ના નારા લગાવ્યા હતા જેના કારણે ઓવૈસીની સદસ્યતા રદ કરવી જોઈએ.
ઓવૈસીએ ‘જય પેલેસ્ટાઈન’ના નારા લગાવ્યા
18મી લોકસભાના પ્રથમ સત્રના બીજા દિવસે AIMIMના વડા અને સાંસદ અસદુદ્દીન ઓવૈસીએ શપથ લીધા બાદ ‘જય પેલેસ્ટાઈન’ના નારા લગાવ્યા હતા. શપથ ગ્રહણ બાદ તેમણે પહેલા જયભીમ બોલ્યા, ત્યારબાદ જય મીમ, જય તેલંગાણા અને જય પેલેસ્ટાઈનના નારા લગાવ્યા.
ઓવૈસીએ 5મી વખત લોકસભાના સભ્ય તરીકે શપથ લીધા. આ દરમિયાન તેમણે કહ્યું કે હું ભારતના હાંસિયામાં ધકેલાઈ ગયેલા લોકોના મુદ્દાઓને ઈમાનદારીથી ઉઠાવતો રહીશ. પરંતુ પેલેસ્ટાઈનને લઈને ઉઠેલા સૂત્રોચ્ચાર બાદ રાજકારણ ગરમાયું હતું, ત્યારબાદ અધ્યક્ષે તેને રેકોર્ડમાંથી હટાવી દીધું હતું.
ઓવૈસીએ સ્પષ્ટતામાં શું કહ્યું?
જ્યારે ઓવૈસીને પૂછવામાં આવ્યું કે શું તેમના દ્વારા આપવામાં આવેલા નારાનો વિરોધ કરવામાં આવી રહ્યો છે, તો AIMIM ચીફે જવાબ આપ્યો કે કોણે શું કહ્યું અને શું ન કહ્યું, બધું તમારી સામે છે. મેં હમણાં જ કહ્યું કે જય ભીમ, જય મીમ, જય તેલંગાણા, જય પેલેસ્ટાઈન… અને એ પણ કહ્યું કે બધાએ શું કહ્યું તે સાંભળો. ઓવૈસીએ કહ્યું કે આ કેવી રીતે વિરુદ્ધ છે, બંધારણની જોગવાઈઓ બતાવો.
