ચંદીગઢમાં 30 જાન્યુઆરીએ યોજાયેલી મેયરની ચૂંટણી આમ આદમી પાર્ટી અને કોંગ્રેસે સંયુક્ત રીતે લડી હતી. આમ છતાં ભાજપના ઉમેદવારનો વિજય થયો હતો. AAPએ ચૂંટણીમાં ધાંધલધમાલનો આરોપ લગાવ્યો અને હાઈકોર્ટમાં ગઈ. જોકે, હાઈકોર્ટે અરજી પર સુનાવણી કરવાનો ઈન્કાર કરી દીધો હતો અને તેને ફગાવી દીધી હતી. આ પછી આમ આદમી પાર્ટી સુપ્રીમ કોર્ટ પહોંચી. સુપ્રીમ કોર્ટ શુક્રવારે આ અરજી પર સુનાવણી કરવા સંમત થઈ છે. રિપોર્ટ અનુસાર, CJI ચંદ્રચુડે મેલ દ્વારા પિટિશન મોકલવાનું કહ્યું હતું. તેઓ બપોરે 1 વાગ્યે આ મામલે સુનાવણી કરશે.
તમને જણાવી દઈએ કે, આમ આદમી પાર્ટીએ આ પહેલા ચૂંટણી પરિણામો પર રોક લગાવવા માટે ચંદીગઢ હાઈકોર્ટમાં અરજી કરી હતી. જો કે હાઇકોર્ટે અરજી ફગાવી દીધી હતી. આ પછી પક્ષ સુપ્રીમ કોર્ટમાં ગયો. AAP કાઉન્સિલરની માંગ છે કે મેયરની ચૂંટણીના પરિણામો રદ કરવામાં આવે. આ સિવાય ચૂંટણી સંબંધિત સમગ્ર રેકોર્ડ સીલ કરી દેવા જોઈએ. ચૂંટણી પ્રક્રિયામાં થયેલી ગેરરીતિઓની તપાસ થવી જોઈએ.
અરજીમાં માંગણી કરવામાં આવી છે કે નિવૃત્ત ન્યાયાધીશની દેખરેખ હેઠળ ફરીથી ચૂંટણી યોજવા સૂચના આપવામાં આવે. તમને જણાવી દઈએ કે ચંદીગઢમાં મંગળવારે યોજાયેલી ચૂંટણીમાં ભાજપ પાસે સાત, AAP પાસે 13 અને શિરોમણિ અકાલી દળ અને સ્વતંત્ર કાઉન્સિલર પાસે એક-એક બેઠક હતી. આમ આદમી પાર્ટી અને કોંગ્રેસને મળીને કુલ 20 વોટ હતા. જ્યારે અપક્ષ સહિત ભાજપને 16 મતો હતા. પરંતુ AAP-કોંગ્રેસના 8 મત અમાન્ય જાહેર થયા હતા.
ચૂંટણી પરિણામો જાહેર થયા બાદ આમ આદમી પાર્ટીએ ભાજપ પર ગેરરીતિનો આરોપ લગાવ્યો હતો. આમ આદમી પાર્ટીના કાર્યકરોએ હોબાળો મચાવ્યો હતો. સીએમ ભગવંત માને એમ પણ કહ્યું કે ભાજપ લોકશાહીની મજાક ઉડાવી રહી છે. જ્યારે તે 20 વોટમાં આ પ્રકારની છેતરપિંડી કરી રહી છે, તો આખા દેશમાં જ્યાં કરોડો લોકો વોટ કરે છે. એમાં તે શું કરશે?
