વિશ્વના સૌથી શક્તિશાળી પાસપોર્ટની રેન્કિંગ જાહેર,જાણો ભારત કયા નંબર પર

આ યાદીમાં પાકિસ્તાનની હાલત ખરાબ છે. તે યમનની સાથે 103મા ક્રમે છે. નોંધનીય છે કે યમન હાલમાં ગૃહયુદ્ધનો સામનો કરી રહ્યું છે. પાકિસ્તાનનું રેન્કિંગ ઉત્તર કોરિયા કરતા પણ ખરાબ છે.

કયા દેશનો પાસપોર્ટ વધુ મજબૂત છે?

આ રેન્કિંગ અનુસાર દુનિયાનો સૌથી પાવરફુલ પાસપોર્ટ સિંગાપોરનો છે. આ યાદીમાં સિંગાપોરને પ્રથમ સ્થાન મળ્યું છે. સિંગાપોર પાસપોર્ટ ધરાવતા લોકો વિઝા વગર અથવા વિઝા ઓન અરાઈવલ સુવિધા સાથે વિશ્વના 195 દેશોની મુલાકાત લઈ શકે છે.

માત્ર 2023 ને છોડીને, સિંગાપોર 2021 થી આ યાદીમાં ટોચ પર છે. જો કે, ગયા વર્ષે 2024 માં, તેણે ફ્રાન્સ, જર્મની, ઇટાલી, જાપાન અને સ્પેન સાથે સંયુક્ત પ્રથમ સ્થાન મેળવ્યું હતું.

આ વખતે જાપાન પાછળ છે

શક્તિશાળી પાસપોર્ટના રેન્કિંગમાં જાપાન દર વખતે સિંગાપોરને ટક્કર આપી રહ્યું છે. આ વર્ષે તેને બીજો ક્રમ મળ્યો છે. જાપાની પાસપોર્ટ ધારકો વિઝા વગર અથવા વિઝા ઓન અરાઈવલ સાથે 193 દેશોમાં જઈ શકે છે.

2024 માં, જાપાને સિંગાપોર અને અન્ય દેશો સાથે પ્રથમ સ્થાન મેળવ્યું. 2023 માં, તેણે સિંગાપોરને પાછળ છોડી દીધું અને પ્રથમ સ્થાન મેળવ્યું. 2022, 2021માં તે સિંગાપોર સાથે નંબર 1 પર રહ્યો.

ભારતનું રેન્કિંગ ઘટ્યું

આ વખતે ભારતનું રેન્કિંગ પણ 5 સ્થાન નીચે આવ્યું છે. આ યાદીમાં ભારતને 85મું સ્થાન મળ્યું છે. જ્યારે ગયા વર્ષે તે 80માં સ્થાને હતો. ભારતનો રેન્ક 2023 માં 84, 2022 માં 83, 2021 માં 90, 2020 માં 82 અને 2019 માં પણ 82 હતો.

આ વર્ષના રેન્કિંગ અનુસાર, ભારતીય પાસપોર્ટ ધરાવનારા લોકો વિઝા ઓન અરાઈવલ અથવા વિઝા ફ્રી સાથે 57 દેશોની મુસાફરી કરી શકે છે. આ દેશોમાં અંગોલા, ભૂતાન, બોલિવિયા, ફિજી, હૈતી, કઝાકિસ્તાન, કેન્યા, મોરેશિયસ, કતાર, શ્રીલંકા વગેરેનો સમાવેશ થાય છે.

પડોશી દેશોની સ્થિતિ

યાદીમાં પાકિસ્તાનને 103મું, અફઘાનિસ્તાન 106મું, નેપાળ 101મું, બાંગ્લાદેશ 100મું, શ્રીલંકા 96મું, મ્યાનમાર 94મું, ભૂટાન 90મું સ્થાન મેળવ્યું છે.