બાંગ્લાદેશમાં તખ્તાપલટ બાદ ત્યાં રહેતા હિંદુઓ ઘણા જુલમનો સામનો કરી રહ્યા છે. દુર્ગા પૂજા દરમિયાન પણ આ અટકવાનું નથી. તેનો પડઘો અમેરિકામાં પણ સંભળાવા લાગ્યો છે. જોકે, બાંગ્લાદેશ સરકારે દુર્ગા પૂજા પહેલા વધારાના સુરક્ષા પગલાં લેવાનો નિર્ણય કર્યો છે. પરંતુ હજુ પણ શંકા છે કે શું બંગાળી ભાષી હિન્દુ સમુદાય સુરક્ષાની ચિંતાઓ હોવા છતાં આ વર્ષે તેનો સૌથી મોટો તહેવાર ઉજવી શકશે કે કેમ.
હિન્દુ સમુદાયના આગેવાનોએ તેમની ચિંતા વ્યક્ત કરી છે. કેટલાક બંગાળી હિંદુઓ આ વર્ષે નવરાત્રિની ઉજવણી રદ કરવાનું વિચારી રહ્યા છે. સોશિયલ મીડિયા પર દુર્ગા પૂજા વિરુદ્ધ કેટલાક વીડિયો પણ પોસ્ટ કરવામાં આવી રહ્યા છે. જો કે, તે વીડિયોની હજુ સુધી પુષ્ટિ થઈ નથી.
ખુલનાના દાકોપમાં કેટલાંક મંદિરોને કથિત રીતે અનામી પત્રો મળ્યા હતા, જેમાં ધમકીઓ આપવામાં આવી હતી. તેમને કહેવામાં આવ્યું છે કે જ્યાં સુધી દરેક મંદિરોમાંથી 5 લાખ રૂપિયા ખંડણી તરીકે લેવામાં નહીં આવે ત્યાં સુધી તેમને દુર્ગા પૂજાની ઉજવણી કરવાની મંજૂરી આપવામાં આવશે નહીં.
બાંગ્લાદેશી અખબાર ડેઈલી સ્ટારે દાકોપની કમરખોલા સર્વજનીન દુર્ગા પૂજા ઉત્સવ સમિતિના પ્રમુખ શેખર ચંદ્ર ગોલ્ડરને ટાંકીને જણાવ્યું હતું કે, “અમારા સભ્યોને હવે તેમાં રસ નથી. અમારે આ વર્ષે પૂજા બંધ કરવી પડશે.”
વિવિધ પૂજા ઉત્સવ સમિતિઓના નેતાઓને આપવામાં આવેલા પત્રોમાં એમ પણ કહેવામાં આવ્યું હતું કે પાલન ન કરવાથી ગંભીર પરિણામો આવશે. શુક્રવારે ચાર મંદિરોના પ્રતિનિધિઓએ દાકોપ પોલીસ સ્ટેશનમાં કેસ નોંધાવ્યો હતો. ડેઈલી સ્ટારે ઓફિસર-ઈન્ચાર્જ સિરાજુલ ઈસ્લામને ટાંકીને જણાવ્યું હતું કે, “અમે મામલાની તપાસ કરી રહ્યા છીએ. અમે સેનાની ટીમ સાથે નિયમિત પેટ્રોલિંગ કરી રહ્યા છીએ.”
