દક્ષિણ કોરિયામાં તાજેતરમાં જ રાતોરાત માર્શલ લૉ લાગુ કરનાર રાષ્ટ્રપતિ યૂનની મુશ્કેલીઓ વધી રહી હોય તેવું લાગી રહ્યું છે. દક્ષિણ કોરિયાની એક અદાલતે મંગળવારે રાષ્ટ્રપતિ યુન સુક યેઓલની અટકાયત કરવા અને તેમની ઓફિસો અને ઘરોની તપાસ માટે વોરંટ જારી કર્યું. દેશમાં ભ્રષ્ટાચારની તપાસ કરતી એજન્સીએ કહ્યું છે કે તે એ પણ તપાસ કરી રહી છે કે શું તેની જાહેરાત બળવો સમાન હતી. વિપક્ષી દળોએ તેમની સામે સંસદમાં મહાભિયોગ પ્રસ્તાવ પણ રજૂ કર્યો હતો.
દક્ષિણ કોરિયાના અધિકારીઓના નિવેદન અનુસાર, સિઓલની એક અદાલતે યુનને અટકાયતમાં લેવા અને તેની ઓફિસ અને ઘરની તપાસ માટે વોરંટ જારી કર્યું છે. દક્ષિણ કોરિયાના કાયદાની વાત કરીએ તો, જો વિદ્રોહમાં દોષિત ઠરે તો તેમને મૃત્યુદંડ અથવા આજીવન કેદની સજા થઈ શકે છે. હાલમાં રાષ્ટ્રપતિ પદ સંભાળવાને કારણે, યુનને મોટાભાગના ફોજદારી કેસોમાંથી પ્રતિરક્ષા છે. જો કે, બળવો કે રાજદ્રોહના આરોપમાં આ વિશેષાધિકાર ઉપલબ્ધ નથી. તે જ સમયે, નિષ્ણાતો કહે છે કે જ્યાં સુધી યુનને ઔપચારિક રીતે પદ પરથી દૂર કરવામાં નહીં આવે ત્યાં સુધી અટકાયત અથવા શોધની શક્યતા ઓછી છે.
યુને દલીલો આપી હતી
નોંધનીય છે કે 14 ડિસેમ્બરે માર્શલ લૉ લાગુ થયા બાદ વિપક્ષના નિયંત્રણવાળી નેશનલ એસેમ્બલીએ યુન વિરુદ્ધ મહાભિયોગ પ્રસ્તાવ રજૂ કર્યો હતો. ત્યારથી, રાષ્ટ્રપતિ યુનની સત્તાઓ સસ્પેન્ડ કરવામાં આવી છે. દેશમાં અચાનક માર્શલ લો લાદવામાં આવ્યા બાદ સેંકડો સૈનિકો અને પોલીસ અધિકારીઓ સિઓલની શેરીઓમાં ઉતરી આવ્યા હતા. યૂને દલીલ કરી હતી કે તેમનો આદેશ સંપૂર્ણપણે કાયદેસર હતો. તેમણે કહ્યું હતું કે વિપક્ષી પાર્ટીઓ ઉત્તર કોરિયા સાથે મળીને દેશને કમજોર કરવા માટે કામ કરી રહી છે.
વોરંટની અવગણના કરી શકે છે
કોરિયાની બંધારણીય અદાલતે નક્કી કરવાનું છે કે યુનને રાષ્ટ્રપતિ પદેથી બરતરફ કરવા જોઈએ કે નહીં. નિષ્ણાતોએ કહ્યું કે યુન વોરંટની અવગણના કરી શકે છે. યુનના વકીલે સોમવારે ભ્રષ્ટાચાર વિરોધી એજન્સીના વોરંટને નકારી કાઢ્યું હતું અને કહ્યું હતું કે તેમની પાસે બળવાના આરોપોની તપાસ કરવાની કાનૂની સત્તા નથી.
