દક્ષિણ આફ્રિકાની જીતથી ભારતની મુશ્કેલીઓ વધી, જાણો કેવી રીતે ટીમ ઈન્ડિયા ફાઈનલમાં પહોંચશે ?

ભારતીય ટીમ ત્રીજા સ્થાને પહોંચી છે

ઓસ્ટ્રેલિયાએ 2023-25 ​​ચક્રમાં 14માંથી 9 મેચ જીતી છે અને 4માં હારનો સામનો કરવો પડ્યો છે. 1 મેચ પણ ડ્રોમાં સમાપ્ત થઈ છે. કાંગારૂ ટીમના 102 પોઈન્ટ છે અને પોઈન્ટ્સની ટકાવારી 60.710 છે. એડિલેડમાં મળેલી હાર બાદ ભારતીય ટીમ ત્રીજા સ્થાને સરકી ગઈ છે.

ટીમ ઈન્ડિયાએ આ ચક્રમાં 16 મેચ રમી છે અને 9માં જીત મેળવી છે. ભારત 6 હાર્યું છે અને 1 મેચ પણ ડ્રો રહી છે. ભારતીય ટીમના 110 પોઈન્ટ છે અને પોઈન્ટ્સની ટકાવારી 57.290 છે. જો રોહિત શર્માની કપ્તાનીવાળી ટીમને WTC ફાઈનલ રમવી હોય તો તેણે કોઈપણ ભોગે ટોપ-2માં રહેવું પડશે. ચાલો જાણીએ કે ભારતીય ટીમ WTC 2023-25ની ફાઈનલ કેવી રીતે રમી શકે છે.

સિરીઝ 1-1 થી બરાબર છે

આ દિવસોમાં ભારત અને ઓસ્ટ્રેલિયા વચ્ચે 5 મેચની બોર્ડર ગાવસ્કર ટ્રોફી રમાઈ રહી છે. સિરીઝ હાલમાં 1-1 થી બરાબર છે. ભારતે પર્થ ટેસ્ટ 295 રને અને ઓસ્ટ્રેલિયાએ એડિલેડ ટેસ્ટ 10 વિકેટે જીતી હતી. જો ભારતે વર્લ્ડ ટેસ્ટ ચેમ્પિયનશિપની ફાઈનલ રમવી હોય તો તેને બોર્ડર ગાવસ્કર ટ્રોફી 4-1 અથવા 3-1થી જીતવી પડશે.

ભારતીય ટીમ WTC ફાઈનલ કેવી રીતે રમી શકે?

• જો રોહિત શર્મા એન્ડ કંપની BGT 3-2 થી જીતે છે તો તેણે ફાઈનલ રમવા માટે શ્રીલંકા પર નિર્ભર રહેવું પડશે. આ માટે શ્રીલંકાએ ઓસ્ટ્રેલિયાને 1 કે 2 ટેસ્ટમાં હરાવવું પડશે.
• જો ભારત અને ઓસ્ટ્રેલિયા વચ્ચેની ટેસ્ટ શ્રેણી 2-2થી બરાબર રહે છે તો શ્રીલંકાએ ઓસ્ટ્રેલિયાને 2-0થી હરાવવું પડશે.
• જો ટીમ ઈન્ડિયા બોર્ડર ગાવસ્કર ટ્રોફી 2-3થી હારી જાય છે તો તેણે ફાઈનલ રમવા માટે બે ટીમો પર નિર્ભર રહેવું પડશે.
• આ સ્થિતિમાં પાકિસ્તાને દક્ષિણ આફ્રિકાને 2-0થી હરાવવું પડશે. તેવી જ રીતે ઓસ્ટ્રેલિયાએ પ્રથમ ટેસ્ટમાં શ્રીલંકાને હરાવવી પડશે.