અમેરિકાના ન્યૂયોર્કમાં સબવે સ્ટેશનમાં ફાયરિંગની ઘટના સામે આવી છે. આ ઘટનામાં એક વ્યક્તિનું મોત થયું છે, જ્યારે પાંચ લોકો ઘાયલ થયા છે. પોલીસના જણાવ્યા અનુસાર, ગોળીબાર સ્થાનિક સમય અનુસાર સોમવારે મોડી સાંજે બ્રોન્ક્સ કન્ટ્રી વિસ્તારમાં થયો હતો. હાલ આ કેસમાં આરોપીની ઓળખ થઈ શકી નથી.
પોલીસનું કહેવું છે કે તેમને સાંજના 4.30 વાગ્યાની આસપાસ ઈમરજન્સી કોલ મળ્યો હતો, જેમાં જણાવ્યું હતું કે માઉન્ટ ઈડન એવન્યુ સ્ટેશન પર છ લોકોને ગોળી વાગી હતી. ટ્રેનમાં બે જૂથો વચ્ચેના પરસ્પર વિવાદનો આ મામલો છે. આ ઘટના બાદ ચાર પુરુષો અને બે મહિલાઓને હોસ્પિટલમાં દાખલ કરવામાં આવ્યા હતા. અહીં સારવાર દરમિયાન 34 વર્ષના યુવકનું મોત થયું હતું. પોલીસનું કહેવું છે કે બાકીના ઘાયલોની હાલત પણ નાજુક છે.
