પરિવાર ભાડાના મકાનમાં રહેતો હતો
આ તમામ લોકો બેંગલુરુના આરએમવી સ્ટેજ 2માં ભાડાના મકાનમાં રહેતા હતા. પોલીસે મૃતદેહોને પોસ્ટમોર્ટમ માટે મોકલી આપ્યા છે. પોસ્ટમોર્ટમમાં જ મોતનું કારણ બહાર આવશે. આ વિસ્તારમાં એક મકાનમાંથી મૃતદેહ મળી આવતા લોકોમાં સનસનાટી મચી ગઈ હતી.
બેંગલુરુ શહેરના ડીસીપી શેખર એચ ટેકન્નવરે આ ઘટનાની પુષ્ટિ કરી છે. ઘટના અંગે માહિતી આપતાં તેમણે જણાવ્યું કે મૃતકોમાં પતિ, પત્ની અને બે બાળકોનો સમાવેશ થાય છે. કેસની તપાસ ચાલી રહી છે.
લાંબા સમય સુધી દરવાજો ન ખૂલ્યો
સોમવારે સવારે જ્યારે ઘરની નોકરાણી આવી ત્યારે લાંબા સમય સુધી દરવાજો ખટખટાવ્યા બાદ પણ કોઈ જવાબ ન મળ્યો. આ પછી તેણે પડોશીઓને આ અંગે જાણ કરી. પાડોશીઓએ પોલીસને બોલાવી. જ્યારે પોલીસ ઘરમાં પ્રવેશી તો તેમને દંપતી અને બાળકોના મૃતદેહ મળ્યા. પ્રાથમિક તપાસ બાદ સામે આવ્યું છે કે અનુપ અને રાખીએ ફાંસી લગાવતા પહેલા પોતાના બાળકોને ઝેર ખવડાવ્યું હતું. એવું કહેવામાં આવી રહ્યું છે કે દંપતી તેમની મોટી પુત્રીની તબિયતની સમસ્યાથી ખૂબ જ ચિંતિત હતા. તેમની પુત્રી અનુપ્રિયા વિકલાંગ હતી.
પરિવાર પુડુચેરી જઈ રહ્યો હતો
ઘરમાં કામ કરતી મહિલાએ જણાવ્યું કે દંપતી તેમની પુત્રીના કારણે માનસિક રીતે પરેશાન હતા. પરિવાર પણ પુડુચેરી જવાની યોજના બનાવી રહ્યો હતો. આ માટે પેકિંગ કરવામાં આવ્યું હતું. પરિવારે બાળકો માટે રસોઈયા અને સંભાળ રાખનાર પણ રાખ્યો હતો. પોલીસે જણાવ્યું કે ઘરમાંથી કોઈ સુસાઈડ નોટ મળી નથી.
વિદ્યાર્થીના મોતથી ચકચાર મચી ગઈ હતી
અન્ય એક ઘટનામાં, બેંગલુરુ IIM વિદ્યાર્થીનું હોસ્ટેલના બીજા માળેથી પડી જવાથી મોત થયું હતું. પોલીસે મૃતદેહને પોસ્ટમોર્ટમ માટે મોકલી આપ્યો છે. વિદ્યાર્થી ગુજરાતનો રહેવાસી હતો. શનિવારે તેનો જન્મદિવસ હતો.
જન્મદિવસની ઉજવણી કર્યા પછી તે તેના રૂમમાં ગયો. બીજા દિવસે સવારે 6 વાગ્યે તેનો મૃતદેહ હોસ્ટેલના લૉનમાં પડેલો મળ્યો હતો. તેને તાત્કાલિક હોસ્પિટલ લઈ જવામાં આવ્યો, પરંતુ ડોક્ટરોએ તેને મૃત જાહેર કર્યો. પોલીસે અકુદરતી મૃત્યુનો ગુનો નોંધી તપાસ હાથ ધરી છે.
