સ્પાઇસજેટ અને ઇન્ડિગોએ જાહેર કરી એડવાઇઝરી મુંબઈમાં ભારે વરસાદને કારણે ફ્લાઇટ્સ પ્રભાવિત થવાની શક્યતા આ વિમાનો લાંબા સમયથી સેવામાં કાર્યરત નહોતા અને તેની નોંધણી રદ થવાથી કંપની પરથી લીઝ ભાડાનો આર્થિક બોજ ઘટશે
મુંબઈ અને આસપાસના વિસ્તારોમાં પડી રહેલા ભારે વરસાદને કારણે હવામાન અત્યંત ખરાબ બન્યું છે, જેની સીધી અસર વિમાન સેવાઓ પર પડી શકે છે. આ પરિસ્થિતિને ધ્યાનમાં રાખીને પ્રાઇવેટ એરલાઇન સ્પાઇસજેટે મુંબઈના મુસાફરો માટે એક મહત્વપૂર્ણ ટ્રાવેલ એડવાઇઝરી જારી કરી છે. એરલાઇને મુસાફરોને ચેતવણી આપી છે કે મુંબઈ એરપોર્ટ પર ભારે વરસાદના કારણે વિમાનોના આગમન અને પ્રસ્થાન તેમજ તેનાથી જાેડાયેલી અન્ય ફ્લાઇટ્સના સમયપત્રકમાં ફેરફાર થઈ શકે છે.
સ્પાઇસજેટે સોશિયલ મીડિયા પ્લેટફોર્મ પર માહિતી શેર કરતા મુસાફરોને અપીલ કરી છે કે તેઓ એરપોર્ટ માટે નીકળતા પહેલા પોતાની ફ્લાઇટનું સ્ટેટસ અવશ્ય તપાસી લે. ખરાબ હવામાનને કારણે ફ્લાઇટ્સ મોડી પડવાની અથવા રી-શેડ્યૂલ થવાની પૂરેપૂરી સંભાવના છે. મુસાફરોએ કોઈપણ પ્રકારની અસુવિધા કે મુશ્કેલીથી બચવા માટે સતર્ક રહેવું જાેઈએ અને સતત અપડેટ્સ મેળવતા રહેવું અનિવાર્ય છે.
બીજી તરફ, સ્પાઇસજેટ કંપની સંબંધિત અન્ય એક ઘટનાક્રમમાં, એરક્રાફ્ટ સપ્લાયર કંપનીઓએ આર્થિક મુશ્કેલીઓનો સામનો કરી રહેલી આ એરલાઇનના ચાર બોઇંગ ૭૩૭-૮ મેક્સ વિમાનોની નોંધણી રદ કરવા માટે ડીજીસીએ (DGCA) નો સંપર્ક કર્યો છે. આ અંગે સ્પાઇસજેટે સ્પષ્ટતા કરી છે કે આ વિમાનો લાંબા સમયથી સેવામાં કાર્યરત નહોતા અને તેની નોંધણી રદ થવાથી કંપની પરથી લીઝ ભાડાનો આર્થિક બોજ ઘટશે.
અગાઉ, અન્ય ખાનગી એરલાઇન ઇન્ડિગોએ પણ કોલકાતામાં ભારે વરસાદની સ્થિતિને જાેતા મુસાફરો માટે સમાન પ્રકારની સલાહ જારી કરી હતી. કોલકાતામાં વરસાદના કારણે હવાઈ સેવાઓ અને રોડ ટ્રાફિક બંને પ્રભાવિત થયા છે. ઇન્ડિગોએ જણાવ્યું હતું કે તેમની ટીમો પરિસ્થિતિ પર સતત નજર રાખી રહી છે. એરલાઇને મુસાફરોને સલાહ આપી હતી કે તેઓ એરપોર્ટ જવા માટે ઘરથી વહેલા નીકળે અને પૂરતો સમય આપે, કારણ કે ખરાબ હવામાન અને ટ્રાફિક જામને કારણે મુસાફરીનો સમય વધી શકે છે. તમામ એરલાઇન્સ દ્વારા મુસાફરોની સુરક્ષા અને સુવિધાને પ્રાથમિકતા આપીને સાવચેતીના પગલાં લેવામાં આવી રહ્યા છે.
