નાર્કોટિક્સ કંટ્રોલ બ્યુરો (NCB) એ વોન્ટેડ સ્મગલર હાજી સલીમ સામે કાર્યવાહી તેજ કરી છે. ‘લોર્ડ ઓફ ડ્રગ્સ’ તરીકે ઓળખાતા દાણચોરને ટ્રેક કરવામાં આવી રહ્યો છે. તેમજ તેના દ્વારા ચલાવવામાં આવી રહેલી કાર્ટેલ પ્રવૃત્તિઓને ખતમ કરવા માટે એક મોટું અભિયાન શરૂ કરવામાં આવ્યું છે. કેન્દ્રીય ગૃહમંત્રી અમિત શાહના નિર્દેશ પર ‘ઓપરેશન સાગર મંથન’ હેઠળ પગલાં લેવામાં આવી રહ્યા છે. NCB હેડક્વાર્ટરની ઓપરેશન બ્રાન્ચના અધિકારીઓ અને ઈન્ટેલિજન્સ વિંગના અધિકારીઓની ટીમ બનાવીને આ ઓપરેશન શરૂ કરવામાં આવ્યું છે. તેમાં ભારતીય નૌકાદળ, ભારતીય કોસ્ટ ગાર્ડ અને ATS ગુજરાત પોલીસના અધિકારીઓ પણ સામેલ છે. તેનો ઉદ્દેશ્ય ગેરકાયદે ડ્રગ્સની દરિયાઈ હેરાફેરી દ્વારા રાષ્ટ્રીય સુરક્ષા માટેના જોખમનો સામનો કરવાનો છે.
અધિકારીઓએ જણાવ્યું કે, હાજી સલીમ હિંદ મહાસાગર ક્ષેત્રમાં સૌથી વધુ વોન્ટેડ ડ્રગ કિંગપિન્સ પૈકીનો એક છે. તેનું ગુનાહિત નેટવર્ક પાકિસ્તાનથી લઈને ભારત અને તેની બહારના ઘણા દેશો સુધી ફેલાયેલું છે. તેના દ્વારા મોટા પાયા પર દવાઓની સપ્લાય કરવામાં આવી રહી છે. ભારત અને પાકિસ્તાન સિવાય હાજી સલીમની દાણચોરી સિન્ડિકેટ મોરેશિયસ, શ્રીલંકા અને માલદીવ જેવા અનેક દેશોમાં કામ કરે છે. આ સિન્ડિકેટ મોટા પ્રમાણમાં ડ્રગ્સની દાણચોરી માટે જવાબદાર છે. યુએસ, મલેશિયા, ઈરાન, શ્રીલંકા, મોરેશિયસ, ન્યુઝીલેન્ડ અને અફઘાનિસ્તાન સહિત અનેક આંતરરાષ્ટ્રીય કાયદા અમલીકરણ એજન્સીઓ હાજી સલીમને શોધી રહી છે. તેને ચારે બાજુથી ઘેરવાના પ્રયાસો થઈ રહ્યા છે.
‘હાજી સલીમ સૌથી મોટા ડ્રગ સ્મગલરોમાંથી એક’
નાર્કોટિક્સ કંટ્રોલ બ્યુરોના ડેપ્યુટી ડાયરેક્ટર જનરલ જ્ઞાનેશ્વર સિંહે કહ્યું, ‘હાજી સલીમ વિશ્વના સૌથી મોટા ડ્રગ સ્મગલરોમાંથી એક છે. તેનું મજબૂત નેટવર્ક એશિયા, આફ્રિકા અને પશ્ચિમી દેશોમાં ફેલાયેલું છે. તેના દ્વારા હેરોઈન, મેથામ્ફેટામાઈન અને અન્ય ગેરકાયદે માદક દ્રવ્યોનો મોટો જથ્થો સપ્લાય કરવામાં આવે છે. તેણે કહ્યું કે હાજી સલીમનું વિશાળ નેટવર્ક છે. તે લાંબા સમયથી અમારા રડાર પર છે. અમારી તપાસ હજુ પ્રારંભિક તબક્કામાં છે. તેથી, હું હાજી સલીમ અથવા અન્ય કોઈના નામ પર વધુ ટિપ્પણી કરવા માંગતો નથી. સિંહે કહ્યું કે, સલીમની દાણચોરીની સિન્ડિકેટનો સ્કેલ અનોખો હતો. તેનું નેટવર્ક નાર્કો-ટેરરિઝમ પ્રવૃત્તિઓ સાથે જોડાયેલું છે જે પ્રદેશને અસ્થિર કરી રહ્યું છે. આ ડ્રગ્સ માત્ર સમાજ માટે જ ખતરો નથી, પરંતુ સરહદ પારથી આતંકવાદી કામગીરીને પણ ભંડોળ પૂરું પાડે છે.
