અમેરિકામાં એક મોટી દુર્ઘટના બની છે. સોમવારે (૧૦ માર્ચ) મિસિસિપીમાં એક મેડિકલ ટ્રાન્સપોર્ટ હેલિકોપ્ટર ક્રેશ થયું. આ દુર્ઘટનામાં એક પાયલોટ અને બે હોસ્પિટલ સ્ટાફના મોત થયા છે.
અહેવાલ મુજબ, યુનિવર્સિટી ઓફ મિસિસિપી મેડિકલ સેન્ટરના આરોગ્ય બાબતોના વાઇસ ચાન્સેલર ડૉ. લુઆન વુડવર્ડે મીડિયા સાથે વાત કરતા જણાવ્યું હતું કે હેલિકોપ્ટર દર્દીઓ સાથે કોલંબસ પરત ફરી રહ્યું હતું ત્યારે બપોરે લગભગ 12:30 વાગ્યે મેડિસન કાઉન્ટીમાં ક્રેશ થયું હતું, જેમાં સવાર તમામ લોકોના મોત થયા હતા. “આ ઘટનાથી સમગ્ર મેડિકલ સેન્ટર પરિવાર દુઃખી છે,” વુડવર્ડે કહ્યું.
’29 વર્ષમાં પહેલો અકસ્માત’
યુનિવર્સિટીના નિવેદન અનુસાર, એરકેર ઇમરજન્સી સેવાઓના 29 વર્ષના સંચાલનમાં આ પહેલો અકસ્માત હતો. તેમણે ક્રેશનું કારણ જણાવ્યું ન હતું પરંતુ કહ્યું હતું કે ફેડરલ એવિએશન એડમિનિસ્ટ્રેશન અને અન્ય અધિકારીઓ તપાસ કરી રહ્યા છે. મૃતકોના પરિવારોને જાણ કરવામાં આવી છે પરંતુ ગુપ્તતા જાળવવા અધિકારીઓએ તેમના નામ જાહેર કર્યા નથી.
“આ અકસ્માત આપણને સુરક્ષિત રાખવા માટે આપણે દરરોજ જે જોખમો લઈએ છીએ તેની દુ:ખદ યાદ અપાવે છે,” મિસિસિપીના ગવર્નર ટેટ રીવ્સે ફેસબુક પર જણાવ્યું. આપણું રાજ્ય આ નાયકોના બલિદાનને ક્યારેય ભૂલશે નહીં.
પેન્સિલવેનિયામાં પણ એક અકસ્માત થયો હતો
રવિવારે (9 માર્ચ) પેન્સિલવેનિયામાં પણ એક વિમાન ક્રેશ થયું હતું. જોકે, વિમાનમાં સવાર તમામ લોકોનો બચાવ થયો હતો. આ ઘટના અંગે માહિતી આપતાં પોલીસ વડા ડુએન ફિશરે જણાવ્યું હતું કે આ ભયાનક અકસ્માત લેન્કેસ્ટર એરપોર્ટની દક્ષિણમાં આવેલા મેનહેમ ટાઉનશીપમાં બપોરે લગભગ 3 વાગ્યે થયો હતો. પાંચેય ઘાયલોને તાત્કાલિક હોસ્પિટલમાં લઈ જવામાં આવ્યા હતા. ફ્લાઇટઅવેર અનુસાર, વિમાન લેન્કેસ્ટર એરપોર્ટથી ઉડાન ભરવાનું હતું અને સ્પ્રિંગફીલ્ડ, ઓહિયો જવાનું હતું. આ અંગે, ફેડરલ એવિએશન એડમિનિસ્ટ્રેશન (FAA) એ કહ્યું કે તે અકસ્માતની તપાસ કરશે.
