‘ભારત છોડો’ નોટિસ પર સુનાવણી ૨ નવેમ્બર સુધી મુલતવી અભિનેતા ઇમરાન ખાનને બોમ્બે હાઈકોર્ટમાંથી વચગાળાની રાહત હવે હાઈકોર્ટની વચગાળાની રાહતને કારણે આગામી સુનાવણી સુધી તેમને કડક કાર્યવાહીથી સુરક્ષા મળી છે બોલિવૂડ અભિનેતા ઇમરાન ખાનને ‘ભારત છોડો’ નોટિસના મામલે બોમ્બે હાઈકોર્ટમાંથી વચગાળાની રાહત મળી છે. અભિનેતાએ ફોરેનર્સ રિજનલ રજિસ્ટ્રેશન ઓફિસ (FRRO) દ્વારા જાહેર કરવામાં આવેલી નોટિસને પડકારતી અરજી હાઈકોર્ટમાં દાખલ કરી હતી. આ અરજી પરની સુનાવણી ૨ નવેમ્બર, ૨૦૨૬ સુધી મુલતવી રાખવામાં આવી છે. અહેવાલ મુજબ, કેન્દ્ર સરકારે પોતાનો જવાબ રજૂ કરવા માટે વધુ સમય માગતાં કોર્ટે આ ર્નિણય લીધો હતો.
અહેવાલમાં જણાવ્યા અનુસાર, આગામી સુનાવણી સુધી અભિનેતા વિરુદ્ધ કોઈ કડક અથવા દબાણયુક્ત કાર્યવાહી કરવામાં નહીં આવે તેવી ખાતરી કોર્ટ સમક્ષ આપવામાં આવી છે. આ સમયગાળા દરમિયાન નોટિસ પરનો વચગાળાનો સ્ટે પણ યથાવત રહેશે. આગામી સુનાવણી ૨ નવેમ્બરે બપોરે ૩ વાગ્યે યોજાવાની છે.
અહેવાલ મુજબ, અમેરિકાની નાગરિકતા ધરાવતા ઇમરાન ખાનને FRRO દ્વારા ૨૮ ઑક્ટોબર સુધીમાં ભારત છોડવાની નોટિસ આપવામાં આવી હતી. આ નોટિસને પગલે અભિનેતાએ કોર્ટનો દરવાજાે ખખડાવ્યો હતો. હવે હાઈકોર્ટની વચગાળાની રાહતને કારણે આગામી સુનાવણી સુધી તેમને કડક કાર્યવાહીથી સુરક્ષા મળી છે.
ઇમરાન ખાને મુંબઈના ઓગસ્ટ ક્રાંતિ મેદાન ખાતે મુખ્ય ચૂંટણી કમિશનર જ્ઞાનેશ કુમાર સામે યોજાયેલા વિરોધ પ્રદર્શનમાં ભાગ લીધો હતો. અહેવાલ મુજબ, આ પ્રદર્શન દરમિયાન મુંબઈ પોલીસે તેમની અટકાયત કરી હતી. ત્યારબાદ ઇમિગ્રેશન સંબંધિત કાયદા હેઠળ તેમની સામે કાર્યવાહી કરવામાં આવી હોવાનો ઉલ્લેખ છે.મીડિયા સાથેની વાતચીતમાં ઇમરાન ખાને જણાવ્યું હતું કે તેઓ કોઈ રાજકીય પક્ષ કે સંગઠનના પ્રતિનિધિ તરીકે નહીં, પરંતુ એક સામાન્ય નાગરિક તરીકે વિરોધ પ્રદર્શનમાં ભાગ લેવા આવ્યા હતા. અહેવાલ અનુસાર, તેઓ અમેરિકામાં જન્મેલા છે અને વર્ક વિઝા પર ભારત આવ્યા હતા.
NCP ના શરદ પવાર જૂથનાં નેતા સુપ્રિયા સુળેએ પણ આ કાર્યવાહી સામે વિરોધ વ્યક્ત કર્યો હોવાનું અહેવાલમાં જણાવાયું છે. તેમણે વિરોધ પ્રદર્શનમાં ભાગ લેવા બદલ કોઈ વ્યક્તિને દેશ છોડવાની ફરજ પાડવા અંગે સવાલો ઉઠાવ્યા હતા.
હાલમાં આ મામલો બોમ્બે હાઈકોર્ટમાં વિચારાધીન છે. ૨ નવેમ્બરની સુનાવણીમાં કેન્દ્ર સરકારનો પક્ષ અને કોર્ટની આગળની કાર્યવાહી પર સૌની નજર રહેશે. નોંધનીય છે કે વચગાળાની રાહતને અંતિમ ચુકાદો માનવો નહીં; કેસનો અંતિમ ર્નિણય હજી બાકી છે.
