સુપ્રીમ કોર્ટે શુક્રવારે સાંજે 6.30 વાગ્યે એક NGOની અરજી પર તાકીદે સુનાવણી કરતા ચૂંટણી પંચ પાસેથી એક સપ્તાહમાં જવાબ માંગ્યો છે. અરજીમાં લોકસભાની ચૂંટણીના દરેક તબક્કાના મતદાન બાદ ચૂંટણી પંચની વેબસાઈટ પર ડેટા અપલોડ કરવાની સૂચના આપવાની માંગ કરવામાં આવી છે.
ચૂંટણી પંચને સમય આપવો જોઈએઃ CJI
આ પહેલા વકીલ પ્રશાંત ભૂષણે સુપ્રીમ કોર્ટને અરજી પર આજે જ સુનાવણી કરવાની વિનંતી કરી હતી. જસ્ટિસ એએસ બોપન્નાને વિદાય આપવા માટે સુપ્રીમ કોર્ટ બાર એસોસિએશન દ્વારા આયોજિત કાર્યક્રમ પૂર્ણ થયા બાદ સુપ્રીમ કોર્ટની બેન્ચ સાંજે સુનાવણી માટે બેઠી હતી. ચીફ જસ્ટિસ ડીવાય ચંદ્રચુડે અરજીનો જવાબ આપવા માટે ચૂંટણી પંચની વિનંતીને યોગ્ય ઠેરવી હતી. બેન્ચે કહ્યું કે ચૂંટણી પંચને અરજીનો જવાબ આપવા માટે થોડો સમય આપવો જોઈએ.
પિટિશનમાં ખોટા આક્ષેપો કરાયા છેઃ ECના વકીલ
આ સાથે, સર્વોચ્ચ અદાલતે લોકસભા ચૂંટણીના છઠ્ઠા તબક્કાના એક દિવસ પહેલા, 24 મેના રોજ ઉનાળાના વેકેશન દરમિયાન યોગ્ય બેંચ સમક્ષ સુનાવણી માટે અરજીની સૂચિબદ્ધ કરી હતી. ટૂંકી સુનાવણી દરમિયાન ચૂંટણી પંચ તરફથી હાજર રહેલા વરિષ્ઠ વકીલ મનિન્દર સિંહે કહ્યું કે એનજીઓ એસોસિએશન ફોર ડેમોક્રેટિક રિફોર્મ્સ (એડીઆર)એ અરજીમાં સંપૂર્ણપણે ખોટા આરોપો લગાવ્યા છે.
આ સિવાય જસ્ટિસ સંજીવ ખન્નાની અધ્યક્ષતાવાળી સર્વોચ્ચ અદાલતની બીજી બેન્ચે કેટલાક મુદ્દાઓનું સમાધાન કર્યું છે. આ મુદ્દો પણ હાલના કેસનો એક ભાગ છે.
