US Presidential Election: અમેરિકાના રાષ્ટ્રપતિ જો બિડેને રાષ્ટ્રપતિ પદની રેસમાંથી હટી ગયા બાદ બુધવારે રાત્રે પહેલીવાર દેશની જનતાને સંબોધિત કરી હતી. આ દરમિયાન, તેમણે કહ્યું કે હવે યુવાનોનો સમય છે અને તેઓ “નવી પેઢીને મશાલ સોંપી રહ્યા છે.”
અમેરિકી રાષ્ટ્રપતિ જો બિડેને નવેમ્બરમાં યોજાનારી રાષ્ટ્રપતિની ચૂંટણીમાંથી પોતાની ઉમેદવારી પાછી ખેંચવાની જાહેરાત કરી છે. ગુરુવારે પોતાની ઓવલ ઓફિસથી સંબોધન કરતી વખતે તેમણે કહ્યું- હું નવી પેઢીને મશાલ સોંપવા માંગુ છું. આંતરિક સર્વેમાં મારી હારના આકલનથી નારાજ થઈને મેં આ નિર્ણય લીધો છે. હું મારા સાથી ડેમોક્રેટ્સને મારી સાથે હારમાં ખેંચી શકતો નથી.
હવે મશાલ નવી પેઢી – બિડેનને સોંપવી પડશે
2024ની ચૂંટણીની રેસમાંથી ખસી જવાની જાહેરાત કર્યા પછી અને દેશના રાષ્ટ્રપતિ માટે ડેમોક્રેટિક પાર્ટીના ઉમેદવાર તરીકે કમલા હેરિસને સમર્થન આપ્યા પછી, પ્રથમ વખત ઓવલ ઑફિસમાંથી રાષ્ટ્રને સંબોધિત કરતા, બિડેને કહ્યું કે આ આપણા રાષ્ટ્રને એક થવાનો શ્રેષ્ઠ માર્ગ છે.
તેમણે કહ્યું કે, મેં નક્કી કર્યું છે કે આગળ વધવાનો શ્રેષ્ઠ માર્ગ નવી પેઢી સુધી મશાલ પહોંચાડવાનો છે. આપણા દેશને એક કરવાનો આ શ્રેષ્ઠ માર્ગ છે. તમે જાણો છો, જાહેર જીવનમાં લાંબા વર્ષોના અનુભવ માટે સમય અને સ્થળ હોય છે. નવા અવાજો, તાજા અવાજો, હા, યુવાન અવાજો માટે પણ સમય અને સ્થળ છે અને તે સમય અને સ્થળ હવે છે.
બિડેને વધુમાં કહ્યું કે, અમેરીકન લોકશાહીને બચાવવા માટે આપણે આપણી જાતને સંગઠિત કરવી જોઈએ… મારા માટે સ્પષ્ટ થઈ ગયું છે કે આ મહત્વપૂર્ણ પ્રયાસમાં મારે મારી પાર્ટીને એકજૂથ કરવી જોઈએ. હું માનું છું કે રાષ્ટ્રપતિ તરીકેનો મારો રેકોર્ડ, મારું નેતૃત્વ અને અમેરિકાના ભવિષ્ય માટેનું મારું વિઝન બધું જ બીજા કાર્યકાળને લાયક છે, પરંતુ આપણા લોકતંત્રને બચાવવામાં કંઈપણ અવરોધ ન આવવો જોઈએ.”
બિડેને કહ્યું, મને અમેરિકન લોકો માટે કામ કરવાની તક મળી અને હું તેનાથી ખુશ છું. પરંતુ આ મારા વિશે નથી, આ તમારા વિશે, તમારા પરિવારો વિશે, તમારા ભવિષ્ય વિશે છે. તે આપણા લોકો વિશે છે… હું માનું છું કે અમેરિકા એક વળાંક પર છે.
બિડેને કમલા હેરિસની પ્રશંસા કરી હતી
બિડેને તેમના સંબોધનમાં કમલા હેરિસને નામ્બરમાં યોજાનારી ચૂંટણી માટે લાયક અને સક્ષમ ઉમેદવાર ગણાવ્યા અને કહ્યું કે, તે અનુભવી, ખડતલ અને સક્ષમ છે. તે મારા માટે અતુલ્ય ભાગીદાર અને આપણા દેશ માટે સમર્પિત નેતા રહી છે. હવે પસંદગી તમારા પર છે, અમેરિકન લોકો. અમેરિકાએ આશા અને નફરત વચ્ચે પસંદગી કરવી જોઈએ. આપણે આપણા પ્રજાસત્તાકને સાચવીએ કે કેમ તે અમેરિકનોના હાથમાં છે.
તેમણે વધુમાં કહ્યું કે તેઓ તેમના કાર્યકાળના બાકીના છ મહિના પૂરા કરશે. તેણે ભાર મૂક્યો કે તેની પાસે કરવા માટેની વસ્તુઓની વ્યસ્ત સૂચિ છે. રાષ્ટ્રપતિએ નોંધ્યું હતું કે તેઓ ગાઝામાં યુદ્ધનો અંત લાવવા માટે કામ કરશે, યુક્રેનને સમર્થન આપવાનું ચાલુ રાખશે અને સુપ્રીમ કોર્ટમાં સુધારો કરશે.
