ગરમીથી ઝઝૂમી રહેલા અમદાવાદના લોકોને રાહત આપવા માટે, અમદાવાદ મ્યુનિસિપલ કોર્પોરેશને મહિલા હાઉસિંગ ટ્રસ્ટના સહયોગથી ‘કૂલ બસ સ્ટોપ’ સેવા શરૂ કરી છે. તેનો હેતુ બસ સ્ટોપ પર રાહ જોઈ રહેલા મુસાફરોને કાળઝાળ સૂર્ય અને ગરમીથી રાહત આપવાનો છે. અમદાવાદમાં હીટ એક્શન પ્લાન હેઠળ, લાલ દરવાજા ટર્મિનલના પ્લેટફોર્મ નંબર 7 અને 8 પર પહેલો કૂલ બસ સ્ટોપ સ્થાપિત કરવામાં આવ્યો છે. જે તાપમાનમાં 6-7 ડિગ્રી ઘટાડો કરવામાં મદદ કરશે.
કૂલ બસ સ્ટોપ કેવી રીતે કામ કરશે?
- આ એક પર્યાવરણને અનુકૂળ પ્રોજેક્ટ છે, જે AC કરતા ઓછો વીજળીનો વપરાશ કરશે.
- પાણીનો છંટકાવ સ્પ્રિંકલર સિસ્ટમની મદદથી કરવામાં આવશે, જે ઠંડક જાળવી રાખશે.
- તે સવારે ૧૧ થી સાંજે ૬ વાગ્યા સુધી ચાલશે અને દરરોજ ૩,૦૦૦ લિટર પાણીનો ઉપયોગ કરશે.
- આ સિસ્ટમ ધૂળને પણ નિયંત્રિત કરશે અને હવાને સ્વચ્છ બનાવશે.
મુસાફરોને લાભ મળશે
લાલ દરવાજા ટર્મિનલ પર દરરોજ 3 હજારથી વધુ લોકો બસોનો ઉપયોગ કરે છે. અમદાવાદના મેયર પ્રતિભા જૈનના જણાવ્યા અનુસાર, આગામી સમયમાં અન્ય બસ સ્ટોપ પર પણ આ સુવિધા શરૂ કરવામાં આવશે.
તમને જણાવી દઈએ કે, માર્ચના મધ્યમાં જ ગુજરાતમાં ઉનાળો આવી ગયો છે. કચ્છ, મોરબી, સુરેન્દ્રનગર, રાજકોટ, જૂનાગઢ, પોરબંદર અને સુરતમાં રેડ એલર્ટ જારી કરવામાં આવ્યું છે. અમદાવાદ સહિત અનેક જિલ્લાઓમાં તાપમાન 40 થી 43 ડિગ્રી સુધી પહોંચી ગયું છે. છેલ્લા 10 વર્ષમાં પહેલી વાર 25 માર્ચ પહેલા તાપમાન 40 ડિગ્રીને પાર થયું છે.
