(નીડર, નિષ્પક્ષ,તટસ્થ છગનલાલ મેવાડા) સુરત.
હવામાન વિભાગ દ્વારા દક્ષિણ ગુજરાતમાં આગામી દિવસોમાં ભારેથી અતિભારે વરસાદની આપેલા રેડ/ઓરેન્જ એલર્ટના પગલે સુરત મહાનગરપાલિકા (SMC) અને જિલ્લા નાગરિક સંરક્ષણ તંત્ર સંપૂર્ણપણે સજ્જ બન્યું છે. નાગરિકોની સુરક્ષા અને સુવિધાને ધ્યાનમાં રાખીને સુરત તંત્ર દ્વારા તમામ જરૂરી આગોતરા પગલાં લેવામાં આવ્યા છે.
મુખ્ય નિર્ણય અને વ્યવસ્થાઓ:
૧. તંત્ર અને અધિકારીઓ એલર્ટ પર: તમામ સંબંધિત ક્ષેત્રીય અધિકારીઓની રજાઓ રદ કરવામાં આવી છે અને સ્થિતિ પર ૨૪x૭ સતત નિરીક્ષણ રાખવામાં આવી રહ્યું છે.
૨. નીચાણવાળા વિસ્તારો અને શેલ્ટર હોમ: ખાડી અને તાપી નદી કિનારાના તથા નીચાણવાળા વિસ્તારોમાં સતત પેટ્રોલીંગ શરૂ કરાયું છે. જરૂર જણાતાં અસરગ્રસ્ત વિસ્તારના રહીશોને સુરક્ષિત સ્થળે શિફ્ટ કરવા માટે આશ્રય સ્થાનો (Shelter Homes) તૈયાર કરવામાં આવ્યા છે.
૩. રેસ્ક્યૂ ટીમ તૈનાત: પૂર અથવા જળબંબાકારની પરિસ્થિતિને પહોંચી વળવા માટે SDRF અને NDRF ની ટુકડીઓ સહિત ફાયર બ્રિગેડની ટીમોને સાધનો સાથે સ્ટેન્ડબાય રાખવામાં આવી છે.
૪. ટ્રાફિક અને માર્ગ સલામતી: ભરાયેલા પાણી અને જળબંબાકારવાળા માર્ગો પર વાહનવ્યવહાર નિયંત્રિત કરવા માટે પોલીસ વિભાગ અને ટ્રાફિક શાખા દ્વારા વિશેષ વ્યવસ્થા કરવામાં આવી છે.
નાગરિકોને અપીલ:
સુરત મહાનગરપાલિકા અને જિલ્લા પ્રશાસન દ્વારા તમામ નાગરિકોને વિનંતી કરવામાં આવે છે કે અફવાઓથી દૂર રહેવું. અત્યંત જરૂરી કામ સિવાય ઘરની બહાર ન નીકળવું અને તંત્ર દ્વારા આપવામાં આવતી સત્તાવાર સૂચનાઓનું જ પાલન કરવું. કોઈપણ ઈમરજન્સી પરિસ્થિતિમાં કંટ્રોલ રૂમનો સંપર્ક કરવા જણાવાયું છે.
