ઘરેલુ સિલિન્ડરના ભાવમાં કોઈ ફેરફાર નહીં કોમર્શિયલ LPG ભાવમાં નજીવો ઘટાડો જાેવા મળ્યો ૧૯ કિલોગ્રામના કોમર્શિયલ સિલિન્ડરના ભાવમાં દિલ્હીથી પટના સુધી રૂ.૧૦નો ઘટાડો નોંધાયો છે
૧ ડિસેમ્બર, ૨૦૨૫ ના રોજ કોમર્શિયલ LPG (લિક્વિફાઇડ પેટ્રોલિયમ ગેસ) સિલિન્ડર અને ઘરેલું સિલિન્ડરના નવા દરો અપડેટ કરવામાં આવ્યા છે. કોમર્શિયલ સિલિન્ડરના ગ્રાહકોને નજીવી રાહત મળી છે, જ્યારે ઘરેલું LPG સિલિન્ડરના દરોમાં કોઈ ફેરફાર કરવામાં આવ્યો નથી.
કોમર્શિયલ LPG સિલિન્ડરના ગ્રાહકોને ૧ ડિસેમ્બર, ૨૦૨૫ ના રોજ નજીવી રાહત મળી છે, જ્યારે ઘરેલું LPG સિલિન્ડરના દરો સ્થિર રહ્યા છે. ૧૯ કિલોના કોમર્શિયલ સિલિન્ડરના ભાવમાં દિલ્હીથી પટના સુધી રૂ.૧૦નો ઘટાડો નોંધાયો છે. રાષ્ટ્રીય રાજધાની દિલ્હીમાં ૧૯ કિલોનો સિલિન્ડર હવે રૂ.૧,૫૯૦.૫૦ ની જગ્યાએ રૂ.૧,૫૮૦.૫૦ માં મળશે. કોલકાતામાં પણ રૂ.૧૦ની રાહત સાથે નવો દર રૂ.૧,૬૮૪ થયો છે. આ જ રીતે, મુંબઈમાં કોમર્શિયલ સિલિન્ડર હવે રૂ.૧,૫૩૧.૫૦ માં અને ચેન્નઈમાં રૂ.૧,૭૩૯.૫૦ માં ઉપલબ્ધ છે.
બીજી તરફ, ૧૪.૨ કિલોગ્રામ વજનના ઘરેલું LPG સિલિન્ડરના દરોમાં આજે કોઈ ફેરફાર થયો નથી. દેશના મુખ્ય મેટ્રો શહેરોમાં ભાવ આ પ્રમાણે છે: દિલ્હીમાં રૂ.૮૫૩, મુંબઈમાં રૂ.૮૫૨.૫૦, કોલકાતામાં રૂ.૮૭૯ અને ચેન્નઈમાં રૂ.૮૬૮.૫૦. અન્ય શહેરોમાં, પટનામાં રૂ.૯૫૧ અને લખનઉમાં રૂ.૮૯૦.૫૦ ના દરે ઘરેલું સિલિન્ડર મળી રહ્યો છે. અંતરિયાળ અને પહાડી વિસ્તારોમાં, જેમ કે કારગિલમાં રૂ.૯૮૫.૫ અને પુલવામામાં રૂ.૯૬૯ છે. અહીં પરિવહન ખર્ચના કારણે ભાવ થોડા ઊંચા રહે છે.
LPG કિંમત મુખ્યત્વે ‘ઇમ્પોર્ટ પેરિટી પ્રાઇસ‘ (IPP) પર આધારિત હોય છે, જેમાં આંતરરાષ્ટ્રીય બજારમાં ગેસની કિંમત, ડૉલર-રૂપિયા વિનિમય દર, નૂર (ફ્રેટ), ટેક્સ વગેરેનો સમાવેશ થાય છે.
રાજ્ય મુજબના તફાવત: વિવિધ રાજ્યોમાં VAT/GST અને લોજિસ્ટિક્સ ખર્ચ અલગ-અલગ હોવાને કારણે દેશના જુદા-જુદા ભાગોમાં દરોમાં તફાવત જાેવા મળે છે.
પરિવહન ખર્ચ: રિફાઇનરી અથવા ડિપોથી દૂરના વિસ્તારોમાં ગેસ પહોંચાડવાનો ખર્ચ વધી જાય છે, જેના કારણે પહાડી, દૂરસ્થ કે ગ્રામીણ વિસ્તારોમાં કિંમતો વધુ હોય છે. સરકારી સબસિડી: ‘ઉજ્જવલા યોજના‘ હેઠળ પાત્ર ગ્રાહકોને મળતી સબસિડીની રકમ સીધી તેમના બેંક ખાતામાં જમા થાય છે, જેનાથી તેમનો વાસ્તવિક ખર્ચ ઘટી જાય છે.
