બોર્ડર-ગાવસ્કર ટ્રોફી 2024-25માં રોહિત શર્મા ભારતનો નિયમિત કેપ્ટન છે. તેને સિડનીમાં રમાઈ રહેલી શ્રેણીની પાંચમી અને છેલ્લી ટેસ્ટમાંથી બહાર કરવામાં આવ્યો હતો. રોહિત બાદ વાઈસ કેપ્ટન જસપ્રીત બુમરાહે ટીમ ઈન્ડિયાની કમાન સંભાળી છે. હવે સિડની ટેસ્ટ દરમિયાન રોહિત શર્મા ‘વોટર બોય’ તરીકે જોવા મળ્યો હતો, જે સોશિયલ મીડિયા પર ઝડપથી વાયરલ થઈ રહ્યો છે.
સિડની ટેસ્ટના બીજા દિવસે ડ્રિંક્સ બ્રેક દરમિયાન નિયમિત ભારતીય કેપ્ટન રોહિત શર્મા ડ્રિંક્સ લઈને મેદાન પર પહોંચ્યો હતો. આ દરમિયાન રોહિતે મેચમાં ટીમ ઈન્ડિયાની કમાન સંભાળી રહેલા જસપ્રીત બુમરાહને ટિપ્સ પણ આપી હતી. ‘વોટર બોય’ તરીકે પહોંચેલ રોહિત શર્મા બ્રેક દરમિયાન બુમરાહ અને રિષભ પંત સાથે વાત કરતો જોવા મળ્યો હતો.
રોહિત શર્મા સિડની ટેસ્ટમાંથી કેમ ડ્રોપ થયો?
તમને જણાવી દઈએ કે રોહિત શર્મા સિડની ટેસ્ટ પહેલા શ્રેણીમાં ત્રણ ટેસ્ટ રમ્યો હતો અને તે ત્રણેય મેચમાં ખરાબ રીતે ફ્લોપ રહ્યો હતો. આ પછી હિટમેને પોતાને સિડની ટેસ્ટમાંથી બહાર કરવાનો નિર્ણય લીધો. રોહિતે ત્રણ મેચની પાંચ ઇનિંગ્સમાં બેટિંગ કરી, જેમાં તેનો હાઇ સ્કોર 10 રન હતો. એડિલેડમાં રમાયેલી પિંક બોલ ટેસ્ટમાં હિટમેને 03 અને 06 રન બનાવ્યા હતા. આ પછી તેણે ગાબા ટેસ્ટમાં 10 રન બનાવ્યા. ત્યારબાદ મેલબોર્નમાં રમાયેલી શ્રેણીની ચોથી ટેસ્ટમાં 03 અને 09 રન બનાવ્યા હતા.
ભારત શ્રેણીમાં છે પાછળ
નોંધનીય છે કે ટીમ ઈન્ડિયા શ્રેણીમાં પાછળ છે. ચાર ટેસ્ટ બાદ યજમાન ઓસ્ટ્રેલિયા 2-1થી આગળ છે. પર્થમાં રમાયેલી શ્રેણીની પ્રથમ ટેસ્ટમાં ટીમ ઈન્ડિયાએ 295 રનથી જીત મેળવી હતી. આ પછી ઓસ્ટ્રેલિયાએ શાનદાર વાપસી કરી અને એડિલેડમાં રમાયેલી પિંક બોલ ટેસ્ટ 10 વિકેટે જીતી લીધી. ત્યારબાદ ગાબા ખાતે રમાયેલી શ્રેણીની ત્રીજી ટેસ્ટ ડ્રોમાં સમાપ્ત થઈ હતી. આ પછી, મેલબોર્નમાં રમાયેલી શ્રેણીની ચોથી ટેસ્ટમાં ઓસ્ટ્રેલિયાએ 184 રનથી જીત મેળવીને 2-1ની લીડ મેળવી હતી.
