Israel-Hamas war: ગાઝામાં, ઇઝરાયેલી દળો ઉત્તરમાં વધુ ઊંડે સુધી ધકેલાઇ ગયા છે, જ્યારે દક્ષિણમાં ઇઝરાયેલી ટેન્ક અને સૈનિકો રફાહ તરફના હાઇવે પર આગળ વધી રહ્યા છે. હમાસ અને ઇસ્લામિક જેહાદ લડવૈયાઓ ગાઝાના કેટલાક વિસ્તારોમાં ફરી એકઠા થયા હોવાથી લડાઈ ફરી તીવ્ર બની છે.
35 હજારથી વધુ પેલેસ્ટિનિયનો મૃત્યુ પામ્યા
સોમવારે ગાઝામાં વિવિધ સ્થળોએ કુલ 57 લોકો માર્યા ગયા હતા. આ સહિત ગાઝામાં સાત મહિનાના યુદ્ધમાં માર્યા ગયેલા પેલેસ્ટિનિયનોની કુલ સંખ્યા 35,091 પર પહોંચી ગઈ છે. ગાઝા પટ્ટીના ઉત્તર અને દક્ષિણમાં ફરી ભીષણ લડાઈ ફાટી નીકળી છે. સૌથી મોટા શહેર ગાઝા સિટીમાં ઘરોને નિશાન બનાવતા ઇઝરાયલી હુમલામાં પાંચ લોકો માર્યા ગયા છે, જ્યારે ઇજિપ્તની સરહદ પર રફાહમાં આશ્રય લેતા પેલેસ્ટિનિયનોની હિજરત ચાલુ છે. ત્યાંથી તેઓ ખાન યુનિસ અને અન્ય કેટલાક વિસ્તારોમાં જઈ રહ્યા છે. પરંતુ હજુ પણ રફાહમાં લગભગ 10 લાખ લોકો બેઘર છે.
વિદેશી રાહત સામગ્રી રફાહ સુધી પહોંચી રહી નથી
દરમિયાન, ઇજિપ્ત દ્વારા સરહદ બંધ કરવાના કારણે, વિદેશી રાહત સામગ્રી રફાહ પહોંચવાનું બંધ થઈ ગયું છે. માનવાધિકાર સંગઠનોએ આ સ્થિતિ પર ચિંતા વ્યક્ત કરી છે અને કહ્યું છે કે રાહત સામગ્રી વિના રફાહમાં જીવન મુશ્કેલ બની જશે. 75 વર્ષ જૂના જબાલિયા શરણાર્થી વિસ્તારમાં પહોંચ્યા બાદ ઇઝરાયેલની ટેન્ક તબાહી મચાવી રહી છે.
રવિવાર-સોમવારની રાત્રે થયેલા હુમલામાં માર્યા ગયેલા 20 થી વધુ લોકોના મૃતદેહ ઘણા ઘરોમાંથી બહાર કાઢવામાં આવ્યા છે. અહીંના લોકોને ખબર નથી કે તેમની સુરક્ષા માટે ક્યાં જવું. ઈઝરાયેલી સેનાએ જાન્યુઆરીમાં એક લાખથી વધુ વસ્તી ધરાવતા જબાલિયામાંથી હમાસને ખતમ કરવાનો દાવો કર્યો હતો, પરંતુ ફરી એકવાર હમાસના લડવૈયાઓ ત્યાં હુમલાઓ ગોઠવી રહ્યા છે.
આપણે સુરક્ષિત ભવિષ્ય માટે લડવું પડશે: નેતન્યાહુ
ઈઝરાયેલના વડાપ્રધાન બેન્જામિન નેતન્યાહુએ કહ્યું છે કે અમે લડાઈ અધવચ્ચે છોડી શકીએ નહીં. આપણી આઝાદીની લડાઈ હજી પૂરી થઈ નથી, તે આ દિવસોમાં પણ ચાલુ છે. આપણે આપણા સુરક્ષિત ભવિષ્ય માટે લડવું પડશે અને હમાસને ખતમ કરવી પડશે.
