ઢાકાની એક કોર્ટે બાંગ્લાદેશના ભૂતપૂર્વ વડા પ્રધાન શેખ હસીનાની ભત્રીજી અને બ્રિટનમાં લેબર પાર્ટીના સાંસદ ટ્યૂલિપ સિદ્દીક વિરુદ્ધ ધરપકડ વોરંટ જારી કર્યું છે. ટ્યૂલિપ સિદ્દીક હાલમાં લંડનમાં રહે છે અને યુકે સંસદમાં હેમ્પસ્ટેડ અને કિલબર્ન મતવિસ્તારના સંસદ સભ્ય છે.
શું મામલો છે?
બાંગ્લાદેશની ભ્રષ્ટાચાર વિરોધી સંસ્થા ACC દ્વારા દાખલ કરાયેલી ચાર્જશીટ અનુસાર, ટ્યૂલિપ સિદ્દીક પર તેમના કાકી શેખ હસીનાના કાર્યકાળ દરમિયાન ઢાકાની બહારના વિસ્તારમાં આવેલા પૂર્વાચલ ન્યૂ ટાઉનના રાજદ્વારી ક્ષેત્રમાં 7,200 ચોરસ ફૂટનો પ્લોટ ગેરકાયદેસર રીતે હસ્તગત કરવાનો આરોપ છે. ઢાકા મેટ્રોપોલિટન સિનિયર સ્પેશિયલ જજ મોહમ્મદ ઝાકિર હુસૈન ગાલિબે ધરપકડ વોરંટ જારી કર્યું અને કહ્યું કે જો આરોપીઓ 27 એપ્રિલ સુધીમાં કોર્ટમાં હાજર ન થાય તો તેમને ભાગેડુ જાહેર કરવા જોઈએ.
૫૨ લોકો સામે વોરંટ
ટ્યૂલિપ સિદ્દીકી ઉપરાંત, આ કેસમાં કુલ 52 અન્ય લોકો સામે ધરપકડ વોરંટ જારી કરવામાં આવ્યું છે. આમાં તેમની માતા શેખ રેહાના, ભાઈ રદવાન, બહેન આઝમીના અને ભૂતપૂર્વ વડા પ્રધાન શેખ હસીનાનો સમાવેશ થાય છે. એવો આરોપ છે કે વર્ષ 2022 માં, હસીના પરિવારે રાજુકના વરિષ્ઠ અધિકારીઓ સાથે મળીને, પૂર્વાચલ સેક્ટર 27 ના રોડ નંબર 203 પર સ્થિત છ 10-કાઠા પ્લોટનો ગેરકાયદેસર કબજો મેળવ્યો હતો.
બ્રિટનમાં પણ હંગામો મચી ગયો
બ્રિટિશ મીડિયા ધ ડેઇલી મેઇલના અહેવાલ મુજબ, આ ધરપકડ વોરંટ પછી, ટ્યૂલિપ સિદ્દીકી હવે વિદેશી ગુનાહિત તપાસમાં વોન્ટેડ ભાગેડુ શંકાસ્પદ બની ગયા છે. એવી પણ શક્યતા છે કે બાંગ્લાદેશી સરકાર તેના પ્રત્યાર્પણની માંગ કરી શકે છે, જોકે હાલમાં યુકે અને બાંગ્લાદેશ વચ્ચે કોઈ પ્રત્યાર્પણ સંધિ નથી.
નોંધનીય છે કે ટ્યૂલિપ સિદ્દીકે જાન્યુઆરી 2025 માં બ્રિટનના ભ્રષ્ટાચાર વિરોધી મંત્રી પદેથી રાજીનામું આપ્યું હતું, જ્યારે એ વાત પ્રકાશમાં આવી હતી કે તેમની સામે ACC દ્વારા તપાસ ચાલી રહી છે.
ટ્યૂલિપ સિદ્દીકના વકીલોએ એક નિવેદન બહાર પાડીને કહ્યું કે, “મિસ સિદ્દીકને ઢાકામાં તેમની વિરુદ્ધ કોઈ સુનાવણીની કોઈ જાણકારી નથી અને તેમને કોઈ ધરપકડ વોરંટની પણ જાણ નથી. સ્પષ્ટપણે કહીએ કે તેમની વિરુદ્ધ કોઈપણ આરોપોનો કોઈ આધાર નથી અને તેમણે ઢાકામાં ગેરકાયદેસર રીતે કોઈ પ્લોટ મેળવ્યો હોવાના દાવામાં કોઈ સત્ય નથી.”
