બેઈજિંગમાં બાળકોની મસ્તી ભારે પડી, ફ્રી એક્ઝિબિશનમાં ૨ કિલો સોનાનો તાજ તૂટી જતા સોશિયલ મીડિયામાં ચર્ચા

આ વીડિયો ચીની બ્લોગર ઝાંગ કાઈયીએ શેર કર્યો છે. તેણે તેના પતિ સાથે મળીને આ એક્ઝિબિશનનું આયોજન કર્યું હતું. તેનો પતિ જ આ વિશેષ ગોલ્ડ ક્રાઉનનો ડિઝાઈનર છે. એક અહેવાલ પ્રમાણે ઝાંગે જણાવ્યું કે, આ તાજ મારા માટે માત્ર ઘરેણું નથી, પરંતુ ભાવનાઓ સાથે સબંધિત એક ખાસ વસ્તું છે. ઝાંગે સ્પષ્ટતા કરી કે આ તાજ વેચાણ માટે નહોતો અને તેની ચોક્કસ કિંમત જણાવવી પણ મુશ્કેલ છે. આ વીડિયો શેર કરવાનો હેતુ બાળક કે તેના પરિવારને દોષ આપવાનો નથી, પરંતુ નુકસાન કેટલું થયું અને તેનું મૂલ્યાંકન કેવી રીતે કરવું તે સમજવાનો હતો.

તેણે આગળ જણાવ્યું કે, તાજનો પહેલેથી જ વીમો કરાવવામાં આવ્યો હતો અને અમે કોઈ પાસેથી વળતર નથી માગ્યું. આ એક્ઝિબિશન સામાન્ય જનતા માટે ફ્રી હતું અને તેને પૈસા કમાવવા માટે નહોતું રાખવામાં આવ્યું.

આ ઘટના બાદ ઈન્ટરનેટ પર લોકોના અલગ-અલગ મંતવ્યો સામે આવ્યા છે. કેટલાક લોકોએ બાળકની સુરક્ષા પર સવાલ ઉઠાવ્યા, જ્યારે અન્ય લોકોએ એક્ઝિબિશનની વ્યવસ્થા પર વાત કરી. કાનૂની નિષ્ણાતોનું કહેવું છે કે આવા કિસ્સાઓમાં ક્યારેક માત્ર સમારકામનો ખર્ચ વસૂલવામાં આવે છે અને ક્યારેક સંપૂર્ણ ખર્ચ પણ વસૂલવામાં આવે છે.

જ્વેલરી એક્સપર્ટનું કહેવું છે કે, આવા ખાસ સોનાના દાગીનાનું સમારકામ ઘણીવાર નવું બનાવવા જેટલું મોંઘું પડી શકે છે. હાલમાં ઝાંગ અને તેના પતિએ હજુ સુધી જાહેરાત કરી નથી કે તાજનું સમારકામ કરવામાં આવશે કે નહીં. તેમણે લોકોને અપીલ કરી છે કે, દુર્ઘટનાથી વધુ એ મહેનત અને પ્રેમને સમજાે, જેની સાથે આ એક્ઝિબિશન લગાવવામાં આવ્યું હતું.