દિગ્વિજય સિંહના નિવેદનથી રાજકીય ગરમાવો હિન્દુત્વ નફરત ફેલાવે છે, તેનાથી દૂર રહો : કોંગ્રેસ સનાતન ધર્મ અને હિન્દુત્વને અલગ ગણાવ્યાં; ઉજ્જૈનથી અયોધ્યા સુધીની પદયાત્રા દરમિયાન રાઘૌગઢમાં આપ્યું નિવેદન કોંગ્રેસના વરિષ્ઠ નેતા અને મધ્યપ્રદેશના પૂર્વ મુખ્યમંત્રી દિગ્વિજય સિંહના હિન્દુત્વ અંગેના નિવેદનથી રાજકીય ચર્ચા શરૂ થઈ છે. તેમણે સનાતન ધર્મ અને હિન્દુત્વને અલગ ગણાવતાં હિન્દુત્વની વિચારધારા નફરત ફેલાવતી હોવાનો દાવો કર્યો હતો. લોકોને હિન્દુત્વથી દૂર રહેવાની સલાહ આપતાં તેમણે સનાતન ધર્મનો મૂળ સંદેશ ‘વસુધૈવ કુટુંબકમ્‘ એટલે કે સમગ્ર વિશ્વ એક પરિવાર હોવાની ભાવના હોવાનું જણાવ્યું હતું.
દિગ્વિજય સિંહે આ નિવેદન તેમની ‘સત્ય સનાતન સ્વાભિમાન યાત્રા‘ દરમિયાન મધ્યપ્રદેશના રાઘૌગઢમાં સભાને સંબોધિત કરતી વખતે આપ્યું હતું. ઉજ્જૈનથી અયોધ્યા સુધી આશરે ૧,૦૦૦ કિલોમીટરની પદયાત્રા પર નીકળેલા દિગ્વિજય સિંહ યાત્રાના પ્રથમ પડાવ બાદ પોતાના વતન રાઘૌગઢ પહોંચ્યા હતા. આ પ્રસંગે તેમના પુત્ર જયવર્ધન સિંહ સહિત પરિવારજનો પણ ઉપસ્થિત રહ્યા હતા.
તેમણે જણાવ્યું હતું કે સનાતન ધર્મનો સાચો અર્થ પ્રેમ, કરુણા અને સમગ્ર વિશ્વને એક પરિવાર માનવાની ભાવનામાં રહેલો છે. સનાતન ધર્મને હિન્દુત્વ સાથે જાેડીને રજૂ કરવામાં આવી રહ્યો હોવાનો આક્ષેપ પણ તેમણે કર્યો હતો.
દિગ્વિજય સિંહે પોતાની પદયાત્રા પાછળના બે મુખ્ય હેતુઓનો ઉલ્લેખ કર્યો હતો. પ્રથમ હેતુ દેશમાં લોકશાહી વ્યવસ્થાને મજબૂત બનાવવાનો હોવાનું તેમણે જણાવ્યું હતું. ચૂંટણી પ્રક્રિયા અને ઈફસ્ અંગે સવાલ ઉઠાવતાં તેમણે ઇલેક્ટ્રોનિક વોટિંગ મશીનના બદલે બેલેટ પેપરથી ચૂંટણી યોજવાની માગ કરી હતી. આ સંદર્ભમાં તેમણે રાહુલ ગાંધી દ્વારા ઉઠાવવામાં આવેલા મતચોરીના આક્ષેપોનો પણ ઉલ્લેખ કર્યો હતો.
યાત્રાના બીજા હેતુ અંગે વાત કરતાં તેમણે ધાર્મિક સંસ્થાઓમાં પારદર્શિતા અને જવાબદારીનો મુદ્દો ઉઠાવ્યો હતો. રામ મંદિર નિર્માણ માટે એકત્રિત કરવામાં આવેલા દાનના હિસાબ અંગે પણ તેમણે સવાલો કર્યા હતા. દિગ્વિજય સિંહે દાવો કર્યો હતો કે રામ મંદિર માટે રૂ.૧,૪૦૦ કરોડનું દાન એકત્રિત થયું હતું, જ્યારે મહંત લાલદાસે હિસાબ માગ્યો ત્યારે રૂ.૮.૨૯ કરોડનો જ હિસાબ આપવામાં આવ્યો હતો. આ આંકડાઓ અંગે તેમણે કરેલા દાવાની સ્વતંત્ર પુષ્ટિ જરૂરી છે.
દિગ્વિજય સિંહના આ નિવેદન બાદ સનાતન ધર્મ અને હિન્દુત્વ વચ્ચેના તફાવત અંગે રાજકીય ચર્ચા ફરી શરૂ થઈ છે. એક તરફ તેઓ સનાતન ધર્મને પ્રેમ, કરુણા અને વિશ્વબંધુત્વની ભાવના સાથે જાેડે છે, તો બીજી તરફ હિન્દુત્વની વિચારધારા સામે વાંધો વ્યક્ત કરે છે. તેમની આ પદયાત્રામાં ધાર્મિક સંસ્થાઓની પારદર્શિતા, લોકશાહી અને ચૂંટણી પ્રક્રિયા જેવા મુદ્દાઓ પણ કેન્દ્રસ્થાને છે.
