Sports News: રણજી ટ્રોફી 2024ની ફાઈનલ મેચ મુંબઈ અને વિદર્ભની ટીમો વચ્ચે મુંબઈના વાનખેડે સ્ટેડિયમમાં રમાઈ રહી છે. આ મેચમાં ચાર દિવસની રમત પૂર્ણ થઈ ગઈ છે. આવી સ્થિતિમાં હવે વિજેતાનો નિર્ણય મેચના અંતિમ દિવસે થશે. મુંબઈ આ મેચ જીતવાથી માત્ર 5 વિકેટ દૂર છે. તે જ સમયે, જો વિદર્ભે જીતવું હોય તો તેને રમતના છેલ્લા દિવસે 290 રન બનાવવા પડશે અને તેની પાસે માત્ર 5 વિકેટ બાકી છે, જે ખૂબ મુશ્કેલ છે.
મેચના ચોથા દિવસે વિદર્ભે સારું પ્રદર્શન કર્યું હતું.
જીતવા માટેના 538 રનના લક્ષ્યાંકનો પીછો કરતા કરુણ નાયરના 74 રન અને કેપ્ટન અક્ષય વાડકરના અણનમ 56 રનની મદદથી વિદર્ભને ફાઈનલના ચોથા દિવસે પાંચ વિકેટે 248 રન બનાવી દીધા હતા. આ સાથે જ મુંબઈને 42મું રણજી ટાઈટલ જીતવા માટે વધુ એક દિવસ રાહ જોવી પડશે. પહેલા દિવસથી જ દબાણમાં રહેલા વિદર્ભને જીતવા માટે અસંભવ ટાર્ગેટ મળ્યો છે. પરંતુ તેના બેટ્સમેનોએ ચોથા દિવસે સારી રમત બતાવીને યજમાન બોલરોને પરેશાન કર્યા હતા.
કરુણ નાયરે લડાયક ઇનિંગ રમી હતી
આ સિઝનની શરૂઆતમાં વિદર્ભ સાથે જોડાયેલા નાયરે 220 બોલનો સામનો કર્યો અને 287 મિનિટ સુધી બેટિંગ કરી. મુશીર ખાનના બોલ પર તેણે પોતાની વિકેટ ગુમાવી હતી. બીજી ઇનિંગમાં 136 રન બનાવ્યા બાદ મુશીરે પણ શાનદાર બોલિંગ કરી હતી. ચોથા દિવસે કેપ્ટન વાડકર 56 રન બનાવીને રમી રહ્યો હતો અને હર્ષ દુબે 11 રન બનાવીને રમી રહ્યો હતો. વાડકરે 91 બોલની ઈનિંગમાં છ ચોગ્ગા ફટકાર્યા હતા. તેણે નાયર સાથે પાંચમી વિકેટ માટે 173 બોલમાં 90 રન જોડ્યા હતા. વિદર્ભને હજુ 290 રનની જરૂર છે અને તેની પાંચ વિકેટ બાકી છે.
મુંબઈના બોલરોને માત્ર 5 વિકેટ મળી હતી
મુંબઈએ પહેલા બે સેશનમાં બે-બે અને પછી છેલ્લા સેશનમાં નાયરની વિકેટ ઝડપી હતી. મુંબઈએ વાનખેડે સ્ટેડિયમની સપાટ પિચ પર બધું જ અજમાવ્યું. મુંબઈના ફાસ્ટ બોલરો અને બંને સ્પિનરોની ત્રિપુટીએ બેટ્સમેનોને ભૂલો કરવા દબાણ કરવાનો શ્રેષ્ઠ પ્રયાસ કર્યો હતો. આવા મુશ્કેલ ટાર્ગેટના જવાબમાં પણ આસાનીથી હાર ન માનવા બદલ વિદર્ભના બેટ્સમેનોની પ્રશંસા કરવી જરૂરી છે. મુંબઈ માટે મુશીરે 17 ઓવરમાં 24 રન આપીને બે વિકેટ ઝડપી હતી અને તે સૌથી અસરકારક રહ્યો હતો. તેણે નાયરને એક શાનદાર બોલ પર આઉટ કર્યો. તનુષ કોટિયને 55 રનમાં બે વિકેટ લીધી હતી. તેણે ધ્રુવ શોરે (28) અને યશ રાઠોડ (7)ને પેવેલિયન મોકલ્યા હતા.
