સુપ્રીમ કોર્ટ ઝારખંડના પૂર્વ મુખ્યમંત્રી અને જેએમએમ નેતા હેમંત સોરેનની ધરપકડને પડકારતી અરજી પર શુક્રવારે સુનાવણી કરવા સંમત થઈ છે. EDએ મની લોન્ડરિંગ કેસમાં JMM નેતાની ધરપકડ કરી છે. ઝારખંડના મુખ્યપ્રધાન પદેથી રાજીનામું આપ્યા બાદ બુધવારે રાત્રે ધરપકડ કરાયેલા સોરેને તેમની ધરપકડને પડકારતા પહેલા હાઈકોર્ટનો સંપર્ક કર્યો હતો.
ઝારખંડ હાઈકોર્ટના કાર્યકારી ચીફ જસ્ટિસ શ્રી ચંદ્રશેખર અને જસ્ટિસ અનુભા રાવત ચૌધરીની બેંચ ગુરુવારે સવારે 10.30 વાગ્યે સોરેનની અરજી પર સુનાવણી કરવાની હતી. જો કે, વરિષ્ઠ વકીલ કપિલ સિબ્બલ અને અભિષેક મનુ સિંઘવીની આગેવાની હેઠળ વકીલોની ટીમે તેમની વ્યૂહરચના બદલી અને ઝારખંડ હાઈકોર્ટ સમક્ષ સુનાવણી કરવાને બદલે સર્વોચ્ચ અદાલતનો સંપર્ક કરવાનો નિર્ણય કર્યો.
સિબ્બલે ચીફ જસ્ટિસ ડીવાય ચંદ્રચુડ, જસ્ટિસ જેબી પારડીવાલા અને મનોજ મિશ્રાની બેંચને કહ્યું કે અમે હાઈકોર્ટમાં દાખલ કરેલી અરજી પાછી ખેંચી લઈશું. સામાન્ય ચૂંટણી પહેલા ધરપકડની આ પદ્ધતિની દેશના રાજકારણ પર વિપરીત અસર પડે છે. સોલિસિટર જનરલ તુષાર મહેતા અને એડિશનલ સોલિસિટર જનરલ એસવી રાજુએ સોરેનની અરજીનો વિરોધ કરતા કહ્યું કે હાઈકોર્ટ પહેલાથી જ ગુરુવારે અરજીની સુનાવણી કરવાની છે.
સિબ્બલે સોરેનની ધરપકડ સાથે સંબંધિત સમય અને અન્ય પ્રક્રિયાગત પાસાઓ પર સવાલ ઉઠાવ્યા હતા. કહ્યું કે આ ગંભીર બાબત છે અને પૂછ્યું કે રાજ્યના મુખ્યમંત્રીની આ રીતે ધરપકડ કેવી રીતે થઈ શકે? આના પર એડિશનલ સોલિસિટર જનરલે જવાબ આપ્યો કે તેમની સામેના આરોપો પણ ખૂબ ગંભીર છે.
