વિશ્વબજારમાં ડોલર ઈન્ડેક્સ ઘટતાં વૈશ્વિક સોનામાં ફંડોની લેવાલી ફરી વધ્યાના નિર્દેશો હતા. ફેડ રિઝર્વ દ્વારા વ્યાજના દરોમાં ઘટાડાના પગલે કિંમતી ધાતુમાં પુરબહાર તેજી આવી છે. સોના અને ચાંદીમાં સતત અધધ ઉછાળો જાેવા મળી રહ્યો છે. તેમાં પણ ગઈકાલે શનિવારે સ્થાનિક બજારમાં ચાંદીની કિંમત રૂ. ૫૦૦૦ના આકર્ષક ઉછાળા સાથે રૂ. ૧,૪૫,૦૦૦ પ્રતિ કિગ્રાના રેકોર્ડ ટોચે પહોંચી હતી. જ્યારે સોનાનો ભાવ ગઈકાલે રૂ. ૫૦૦ વધી રૂ. ૧,૧૮,૨૦૦ પ્રતિ ૧૦ ગ્રામ થયો હતો.
વિશ્વબજારમાં સોનાના ભાવ ઔંશના ૩૭૫૧થી ૩૭૫૨ ડોલર વધી હાઈમાં ભાવ ૩૭૮૨થી ૩૭૮૩ થઈ છેલ્લે ભાવ સપ્તાહના અંતે ૩૭૫૯થી ૩૭૬૦ ડોલર રહ્યાના સમાચાર મળ્યા હતા. વિશ્વબજારમાં ડોલર ઈન્ડેક્સ ઘટતાં વૈશ્વિક સોનામાં ફંડોની લેવાલી ફરી વધ્યાના નિર્દેશો હતા. વિશ્વબજાર વધતાં ઘરઆંગણે કિંમતી ધાતુઓની ઈમ્પોર્ટ કોસ્ટ ઉંચી જતાં દેશના ઝવેરીબજારોમાં ઐતિહાસિક તેજી જાેવા મળી હતી. દરમિયાન અમદાવાદ ઝવેરીબજારમાં સોનાના ભાવ ૧૦ ગ્રામના વધુ રૂ.૫૦૦ વધી ૯૯૫ના ભાવ રૂ.૧૧૭૯૦૦ તથા ૯૯૯ના ભાવ રૂ.૧૧૮૨૦૦ બોલાયા હતા. જ્યારે અમદાવાદ ચાંદીના ભાવ કિલોના ઝડપી રૂ.૫૦૦૦ ઉછળી રૂ.૧૪૫૦૦૦ બોલાતાં ખેલાડીઓ સ્તબ્ધ બની ગયા હતા.
અમેરિકામાં મોંઘવારી અપેક્ષિત લક્ષ્યાંક કરતાં વધુ નોંધાતાં ફેડ રિઝર્વ દ્વારા વ્યાજના દરોમાં ૦.૨૫ ટકાનો ઘટાડો કરવામાં આવ્યો હતો. આ ઘટાડા બાદ કિંમતી ધાતુમાં તેજી જ તેજી છે. વૈશ્વિક અને સ્થાનિક બજારોમાં સોના અને ચાંદી દરરોજે નવી રેકોર્ડ ટોચ બનાવી રહ્યા છે. વિશ્વ બજારમાં ચાંદીના ભાવ ઔંશના ૪૫.૧૩થી ૪૭.૧૪ વાળા વધી ઉંચામાં ભાવ ૪૬ ડોલરની સપાટી પાર કરી ૪૬.૬૨થી ૪૬.૬૩ સુધી ઉછળી છેલ્લે ભાવ ૪૬.૦૮થી ૪૬.૦૯ ડોલર રહ્યા હતા. દરમિયાન, અમેરિકામાં ફુગાવાનો દર અપેક્ષા મુજબ આવતાં ત્યાં હવે ઓક્ટોબર તથા ડિસેમ્બરમાં મળનારી ફેડરલ રિઝર્વની મિટિંગમાં વ્યાજના દરમાં વધુ ઘટાડો થવાની અપેક્ષા વચ્ચે ડોલરનો વૈશ્વિક ઈન્ડેક્સ ઘટાડા પર રહ્યો હતો.
ડોલરનો ગ્લોબલ ઈન્ડેક્સ ૦.૩૮ ટકા ઘટી નીચામાં ૯૮.૧૩ થઈ છેલ્લે ૯૮.૧૮ રહ્યો હતો. મુંબઈ કરન્સી બજારમાં બંધ બજારે ડોલરના ભાવ રૂ.૮૮.૭૩થી ૮૮.૭૪ આસપાસ શાંત હતા. વિશ્વબજારમાં પ્લેટીનમના ભાવ વધી ૧૨ વર્ષની ટોચે પહોંચ્યા હતા. પ્લેટીનમના ભાવ ઔંશના ૧૫૩૯થી ૧૫૪૦ વાળા વધી ૧૫૮૬ થઈ છેલ્લે ભાવ ૧૫૮૦થી ૧૫૮૧ ડોલર રહ્યા હતા જ્યારે પેલેડીયમના ભાવ ૧૨૫૫થી ૧૨૫૬ વાળા વધી ૧૨૮૫ થઈ છેલ્લે ભાવ ૧૨૬૫થી ૧૨૬૬ ડોલર રહ્યા હતા.
મુંબઈ બુલિયન બજારમાં સોનાના ભાવ જીએસટી વગર ૯૯૫ના રૂ.૧૧૨૮૦ વાળા રૂ.૧૧૩૪૦૦ રહ્યા હતા જ્યારે ૯૯૯ના રૂ.૧૧૩૨૬૨ વાળા વધી રૂ.૧૧૩૮૫૦ રહ્યા હતા. મુંબઈ ચાંદીના ભાવ જીએસટી વગર રૂ.૧૩૮૧૦૦ વાળા રૂ.૧૪૨૦૦૦ બોલાયા હતા. મુંબઈ સોના- ચાંદીમાં જીએસટી સાથેના ભાવ આ ભાવથી ત્રણ ટકા ઉંચા રહ્યા હતા. દરમિયાન, ભારત દ્વારા રશિયાથી ક્રૂડતેલની આયાતનો અમેરિકા દ્વારા વિરોધ કરાતાં ઈરાન તથા વેનેઝુએલાથી ક્રૂડતેલની આયાત કરવાની છૂટ આપો એવી રજૂઆત ભારતે અમેરિકાને કર્યાના વાવડ મળ્યા હતા.
