જાગૃતિ : આત્મજ્ઞાનથી વિશ્વકલ્યાણ સુધીની આધ્યાત્મિક યાત્રા
૭૯મા વાર્ષિક નિરંકારી સંત સમાગમના પ્રાર્થના દિવસના સંદર્ભમાં એક આધ્યાત્મિક ચિંતન માનવજીવનમાં જાગૃતિનું મહત્ત્વ અનન્ય છે.જાગૃતિ વિના જ્ઞાન અધૂરું છે,જ્ઞાન વિના વિવેક અધૂરો છે અને વિવેક વિના જીવનનું સાચું કલ્યાણ શક્ય બનતું નથી.૭૯મા વાર્ષિક નિરંકારી સંત સમાગમના સંદર્ભમાં ૨૧ ઓક્ટોબર, ૨૦૨૬ના રોજ યોજાયેલા પ્રાર્થના દિવસની ભાવના આપણને આત્મચિંતન,
પરમાત્માની સર્વવ્યાપકતાની ઓળખ અને સમગ્ર માનવજાતના કલ્યાણ માટે પ્રેરિત કરે છે.નિરંકારી મિશનના આધ્યાત્મિક સંદેશમાં ‘જાગૃતિ’નો અર્થ માત્ર ઊંઘમાંથી જાગવું નથી પરંતુ અજ્ઞાનમાંથી જ્ઞાન તરફ, અહંકારમાંથી નમ્રતા તરફ, દ્વેષમાંથી પ્રેમ તરફ અને સ્વાર્થમાંથી પરમાર્થ તરફ આગળ વધવું છે. ‘જાગૃતિ’ એટલે જાગવું, સચેત થવું અને અજ્ઞાનમાંથી બહાર આવવું. શારીરિક સ્તરે ઊંઘમાંથી જાગવું, માનસિક સ્તરે પરિસ્થિતિ સમજવી, બૌદ્ધિક સ્તરે સત્ય-અસત્યનો વિવેક કરવો અને આધ્યાત્મિક સ્તરે પોતાના સાચા સ્વરૂપ તથા પરમ સત્યની ઓળખ પ્રાપ્ત કરવી એ જાગૃતિનાં વિવિધ પાસાં છે.માનવી ધન, સંપત્તિ, પદ અને પ્રતિષ્ઠા મેળવવામાં વ્યસ્ત રહે છે પરંતુ ‘હું કોણ છું? મારા જીવનનો હેતુ શું છે?’ જેવા મૂળભૂત પ્રશ્નો ભૂલી જાય છે,આ પ્રશ્નો પ્રત્યે સજાગ બનવું એ આંતરિક જાગૃતિની શરૂઆત છે.
નિરંકારી મિશનની વિચારધારા અનુસાર સદગુરૂના માર્ગદર્શનથી પ્રાપ્ત બ્રહ્મજ્ઞાન માનવીને નિરાકાર પરમાત્મા એટલે નિરંકારની ઓળખ અને તેની સર્વવ્યાપકતાની અનુભૂતિ તરફ દોરી જાય છે. આ જ્ઞાન જીવનમાં પ્રેમ-નમ્રતા અને માનવતાનું પરિવર્તન લાવે ત્યારે જ તેની સાચી સાર્થકતા પ્રગટે છે. નિરંકારી મિશનનો મહત્વપૂર્ણ આધ્યાત્મિક ગ્રંથ ‘સંપૂર્ણ અવતાર વાણી’ માનવીને પરમાત્માની
ઓળખ-આત્મચિંતન અને જીવનના સાચા હેતુ તરફ પ્રેરણા આપે છે.મોહ, લોભ, ઈર્ષ્યા, દ્વેષ અને અહંકારમાં ડૂબેલું મન પણ અજ્ઞાનની ઊંઘમાં હોય છે. બીજાની ભૂલો શોધવાને બદલે પોતાની ખામીઓ ઓળખવી અને સદગુરૂના માર્ગદર્શનથી સ્વભાવને નિર્મળ બનાવવો એ જાગૃતિનું સાચું સ્વરૂપ છે. આધ્યાત્મિક જાગૃતિ માનવીની દ્રષ્ટિ બદલે છે. જાતિ,ધર્મ,ભાષા,વસ્ત્ર કે સંપત્તિના ભેદથી ઉપર
ઊઠીને દરેક માનવીમાં એક જ પરમાત્માની હાજરીનો ભાવ અનુભવવો એ માનવ એકતાનો પાયો છે. મતભેદ હોવા છતાં પરસ્પર આદર જાળવવો અને દ્વેષને બદલે સંવાદનો માર્ગ અપનાવવો એ પણ જાગૃતિ છે.પરિવારમાં પ્રેમ,વિશ્વાસ,ક્ષમા અને સહકાર જાળવવા,વડીલોનો આદર કરવા, યુવાનોને યોગ્ય માર્ગદર્શન આપવા તથા બાળકોમાં સારા સંસ્કારોનું સિંચન કરવા માટે પણ જાગૃતિ જરૂરી છે.
નિરંકારી મિશનની આધ્યાત્મિક જીવનદ્રષ્ટિમાં સત્સંગ-સિમરણ અને સેવા મહત્વપૂર્ણ છે. સત્સંગ સદ્વિચારોની પ્રેરણા આપે છે,સિમરણ મનને પરમાત્મા સાથે જોડે છે અને સેવા જ્ઞાનને જીવનના વ્યવહારમાં ઉતારવાનું માધ્યમ બને છે.જરૂરિયાતમંદને સહાય કરવી, બીમારની સંભાળ રાખવી, રક્તદાન કરવું અને પર્યાવરણનું જતન કરવું એ માનવતાભરી સેવાનાં સ્વરૂપો છે.
પ્રાર્થના દિવસની ભાવના આપણને પોતાના સુખની સાથે સમગ્ર માનવજાતના કલ્યાણનો વિચાર કરવા પ્રેરે છે.દુઃખી અને નિરાશ લોકોને આશા મળે,દરેક પરિવારમાં સુખશાંતિ રહે,પ્રકૃતિનું સંતુલન જળવાય અને યુવાનોને સદ્માર્ગે ચાલવાની પ્રેરણા મળે-એવી શુભભાવના કેળવવી જોઈએ.પ્રાર્થના ત્યારે વધુ સાર્થક બને છે જ્યારે તેના ભાવને કર્મમાં ઉતારવામાં આવે. વિશ્વશાંતિની પ્રાર્થના સાથે પોતાના ઘરમાં શાંતિ સ્થાપવી,માનવએકતાની વાત સાથે ભેદભાવ દૂર કરવો અને પર્યાવરણની રક્ષા માટે વ્યવહારૂ પ્રયત્નો કરવા એ સાચી જાગૃતિ છે.
જાગૃતિ કોઈ એક દિવસની ઘટના નથી પરંતુ જીવનભર ચાલતી આત્મવિકાસની યાત્રા છે. રોજિંદા જીવનમાં વાણીની મધુરતા, વિચારોની શુદ્ધતા, વર્તનની નમ્રતા અને સેવાની ભાવના કેળવવી એ જ તેની સાધના છે.૭૯મા વાર્ષિક નિરંકારી સંત સમાગમના પ્રાર્થના દિવસનો આધ્યાત્મિક ભાવ આપણને આત્મજ્ઞાનથી માનવકલ્યાણ સુધીની યાત્રા માટે પ્રેરિત કરે છે.જ્યારે મનમાંથી દ્વેષ ઘટે, વિચારોમાં સદબુદ્ધિ પ્રગટે, વાણીમાં મધુરતા આવે, હાથ સેવામાં જોડાય અને હૃદયમાં વિશ્વબંધુત્વની ભાવના જાગે ત્યારે જાગૃતિ જીવનનું જીવંત સત્ય બને છે.
આવો સદગુરૂના ચરણોમાં પ્રાર્થના કરીએ કે સમગ્ર માનવજાત પ્રેમ-શાંતિ અને એકતાના સૂત્રમાં બંધાય અને દરેક વ્યક્તિ પોતાના જીવન દ્વારા માનવતાનો પ્રકાશ ફેલાવે.સાચી જાગૃતિ એ જ છે-પોતે જાગવું, બીજાના જીવનમાં પ્રકાશ બનવું અને સમગ્ર સૃષ્ટિના કલ્યાણ માટે સમર્પિત થવું.
રીપોર્ટઃ
વિનોદભાઇ માછી નિરંકારી
નવીવાડી તા.શહેરા જી.પંચમહાલ
૯૭૨૬૧૬૬૦૭૫(મો)
