કેન્દ્રીય ગૃહ સચિવે વ્યવસ્થાઓની સમીક્ષા કરી વડાપ્રધાન મોદી ફરીવાર ગુજરાત પ્રવાસે આવશે VVIP સર્કિટ હાઉસ ખાતે ઉચ્ચસ્તરીય બેઠક પણ યોજાઈ સરદાર વલ્લભભાઈ પટેલની ૧૫૧મી જન્મજયંતિ નિમિત્તે નર્મદા જિલ્લાના એકતાનગર ખાતે ૩૦ અને ૩૧ ઓક્ટોબર, ૨૦૨૬ના રોજ રાષ્ટ્રીય એકતા દિવસની ઉજવણી યોજાશે. વડાપ્રધાન નરેન્દ્ર મોદીની ઉપસ્થિતિમાં યોજાનારા આ કાર્યક્રમ પહેલાં તૈયારીઓની સમીક્ષા માટે કેન્દ્રીય ગૃહ સચિવ ગોવિંદ મોહને એકતાનગરની મુલાકાત લીધી હતી. એકતાનગર હેલિપેડ પર પહોંચ્યા બાદ ગોવિંદ મોહને કાર્યક્રમ સાથે જાેડાયેલા વિવિધ સ્થળોનું નિરીક્ષણ કર્યું. તેમણે એલડબલ્યુઈ પોડ્સ, ટેબ્લો ડોમ, એકતા પથ, સલામી મંચ, ભારત પર્વના આયોજન સ્થળ અને સાંસ્કૃતિક કાર્યક્રમો માટે ઊભી કરાયેલી વ્યવસ્થાઓની સમીક્ષા કરી હતી. રાષ્ટ્રીય કક્ષાના કાર્યક્રમમાં દેશભરમાંથી મહાનુભાવો, અધિકારીઓ અને આમંત્રિતો આવવાના હોવાથી વ્યવસ્થાઓમાં વિભાગો વચ્ચે સંકલન જળવાય તે અંગે અધિકારીઓને સૂચના અપાઈ હતી. સુરક્ષા, મહેમાનોના આગમન અને કાર્યક્રમ સ્થળોની વ્યવસ્થા સહિતની તૈયારીઓ સમયસર પૂર્ણ કરવા પર ભાર મૂકાયો હતો. આ મુલાકાત દરમિયાન VVIP સર્કિટ હાઉસ ખાતે ઉચ્ચસ્તરીય સમીક્ષા બેઠક પણ યોજાઈ હતી. વિવિધ વિભાગોના અધિકારીઓએ તૈયારીઓની પ્રગતિ અંગે માહિતી આપી હતી. સોંપાયેલી જવાબદારીઓ નિર્ધારિત સમયમાં પૂર્ણ થાય અને કાર્યક્રમના દરેક તબક્કે વ્યવસ્થા જળવાય તે માટે કેન્દ્રીય ગૃહ સચિવે માર્ગદર્શન આપ્યું હતું.
ઉજવણીના ભાગરૂપે ૩૦ ઓક્ટોબરે ડેમ વૂ પૉઇન્ટ-૧ ખાતે નેશનલ સ્કૂલ ઑફ ડ્રામા દ્વારા ‘આનંદમઠ’નું પ્રસ્તુતિકરણ થશે. આ સાંસ્કૃતિક કાર્યક્રમ ઉપરાંત ઉજવણીમાં વિવિધ પ્રદર્શનો, ટેબ્લો અને અન્ય પ્રવૃત્તિઓ પણ યોજાશે. વડાપ્રધાનના પ્રવાસ અને રાષ્ટ્રીય એકતા દિવસના આયોજનને ધ્યાનમાં રાખીને એકતાનગરમાં વહીવટી તંત્ર તૈયારીઓને અંતિમ સ્વરૂપ આપી રહ્યું છે. આગામી દિવસોમાં બાકી રહેલી કામગીરી પૂર્ણ કરી કાર્યક્રમ સુવ્યવસ્થિત રીતે યોજાય તે માટે વિવિધ વિભાગો સંકલન સાથે કામ કરશે.
