રોગચાળો ફેલાવાનો તંત્રને ડર બિહારના સારણમાં પૂરથી ૨૩૬ ગામો પાણીમાં, ૪.૬૦ લાખ લોકો પ્રભાવિત પૂરથી ઘેરાયેલા બિહારના છપરા,સારણ જિલ્લામાં જળસ્તર ધીમે ધીમે ઘટી રહ્યું છે જાેકે હજુ પણ ૬ થી વધુ બ્લોકમાં પૂરના કારણે જનજીવન ખરાબ રીતે પ્રભાવિત છે બિહારના સારણમાં પૂરના પાણી ધીમે ધીમે ઓસરી રહ્યા છે, પરંતુ ૬ બ્લોક અને NH-૭૨૨ હજુ પણ જળમગ્ન છે, જેના કારણે જનજીવન અસ્તવ્યસ્ત થઈ ગયું છે. આ પૂરથી લાખો લોકો પ્રભાવિત થયા છે અને હજારો લોકોએ સ્થળાંતર કર્યું છે. પૂરથી ઘેરાયેલા બિહારના છપરા,સારણ જિલ્લામાં જળસ્તર ધીમે ધીમે ઘટી રહ્યું છે. જાેકે હજુ પણ ૬ થી વધુ બ્લોકમાં પૂરના કારણે જનજીવન ખરાબ રીતે પ્રભાવિત છે. આ પૂરના કારણે મકેરમાં એનએચ-૭૨૨ મુઝફ્ફરપુર-છપરા હાઇવે પર હજુ પણ લગભગ અડધો ફૂટ પાણી ભરાયેલા છે. તો બીજી તરફ અનેક ગામોના રસ્તાઓ ધોવાઈ ગયા છે, અને ડઝનબંધ ઘરો જમીનદોસ્ત થઈ ચૂક્યા છે. જિલ્લા વહીવટીતંત્રના અહેવાલ મુજબ કેટલાક વિસ્તારોમાં પૂરના પાણી ઓસર્યા પણ છે.
આ તમામ વિસ્તારોમાં ચેપ અને રોગચાળો ફેલાતો અટકાવવા માટે બ્લીચિંગ પાવડરનો છંટકાવ કરવામાં આવી રહ્યો છે. ડિઝાસ્ટર મેનેજમેન્ટના જણાવ્યા અનુસાર, જિલ્લાના ૬ બ્લોકની ૪૨ પંચાયતોના ૨૩૬ ગામો હજુ પણ પૂરથી પ્રભાવિત છે. આ વિસ્તારોમાં રાહત, બચાવ, આરોગ્ય, પીવાનું પાણી, પશુ ચિકિત્સા અને અનાજ પુરવઠા સહિતની આવશ્યક સેવાઓ સતત ચલાવવામાં આવી રહી છે. એક અંદાજ મુજબ આ પૂરથી આશરે ૪ લાખ ૬૦ હજાર ૯૬૩ ની વસ્તી અને ૧ લાખ ૪ હજાર ૪૩ પરિવારો પ્રભાવિત થયા છે.
પૂરના કારણે લગભગ ૭૪,૭૩૭ લોકોએ સ્થળાંતર કર્યું છે. આ તમામ લોકો પ્રભાવિત વિસ્તારોમાંથી નીકળીને સુરક્ષિત સ્થળોએ રહી રહ્યા છે. જે લોકો રાહત અને બચાવ છાવણીઓમાં રહી રહ્યા છે, તેમના માટે જરૂરી સંસાધનો સતત પૂરા પાડવામાં આવી રહ્યા છે. આરોગ્ય વિભાગ દ્વારા ૫૪ મેડિકલ કેમ્પ લગાવવામાં આવ્યા છે, જ્યાં અત્યાર સુધીમાં ૧૪,૦૧૨ દર્દીઓની સારવાર કરવામાં આવી છે. તો બીજી તરફ પ્રભાવિત વિસ્તારોમાં પશુઓ માટે ચારા અને સારવારની વ્યવસ્થા પણ કરવામાં આવી છે.આપત્તિ વ્યવસ્થાપન વિભાગના જણાવ્યા અનુસાર, પ્રભાવિત વિસ્તારોમાં ૧૩૩ સામુદાયિક રસોડા ચલાવવામાં આવી રહ્યા છે. અહીંથી ૪ લાખ ૫૧ હજાર ૫૩૮ લોકોને ભોજન પૂરું પાડવામાં આવ્યું છે. વાહનવ્યવહાર અને રાહત-બચાવ કામગીરી માટે ૧૨૮ હોડીઓ ચલાવવામાં આવી રહી છે. આ જ ક્રમમાં પ્રભાવિત વિસ્તારોમાં ૫૫,૭૧૮ પોલિથીન શીટ્સનું વિતરણ કરવામાં આવ્યું છે. તો બાળકોને પોષક તત્વો પૂરા પાડવા માટે પ્રભાવિત પંચાયતોમાં ૨૫૪ આંગણવાડી કેન્દ્રો ચલાવવામાં આવી રહ્યા છે.
