બેંગલુરુમાં છેલ્લા ત્રણ દિવસથી સતત વરસાદના કારણે હાહાકાર મચી ગયો છે. ઘણા વિસ્તારોમાં પૂરના કારણે શહેરમાં ફસાયેલા લોકોને બચાવવા માટે મંગળવારે NDRF અને SDRFની પાંચ ટીમો તૈનાત કરવામાં આવી હતી.
દરમિયાન શહેરના પૂર્વ વિસ્તારમાં નિર્માણાધીન એક ઈમારત ધરાશાયી થવાના કારણે અનેક લોકો કાટમાળ નીચે દટાઈ ગયા છે. લોકોને બચાવવાની કામગીરી ચાલી રહી છે. અત્યાર સુધીમાં ત્રણ મૃતદેહ મળી આવ્યા છે. 14 લોકોને બચાવી લેવામાં આવ્યા છે, જ્યારે ત્રણ લોકો હજુ પણ ગુમ છે. તે જ સમયે કેંગેરી તળાવમાં બે બાળકો ડૂબી ગયા છે.
શાળાઓમાં રજા જાહેર કરી
અગ્નિશમન વિભાગના એક અધિકારીએ જણાવ્યું કે, પ્રાથમિક તપાસ મુજબ આખી ઇમારત ધરાશાયી થઈ હતી અને ત્યારબાદ લોકો તેની નીચે દટાઈ ગયા હતા. ફાયર અને ઈમરજન્સી વિભાગની બે રેસ્ક્યુ વાન બચાવ કામગીરીમાં તૈનાત કરવામાં આવી છે. શહેરના અનેક વિસ્તારોમાં સતત ભારે વરસાદ પડી રહ્યો છે ત્યારે બિલ્ડીંગ ધરાશાયી થવાની ઘટના બની છે. સત્તાવાળાઓએ બુધવારે પણ શાળામાં રજા જાહેર કરી હતી.
ઉત્તર બેંગલુરુ સૌથી વધુ પ્રભાવિત છે
બેંગલુરુમાં વરસાદે વિનાશ વેર્યા પછી, કર્ણાટક સરકારે કેટલાક એપાર્ટમેન્ટના લગભગ 600 રહેવાસીઓને આઠ દિવસ માટે સ્થળાંતર કરવા કહ્યું છે કારણ કે વરસાદી પાણી સંકુલમાં ભરાઈ ગયા છે, જેનાથી લોકોની સલામતી જોખમમાં છે. ઉત્તર બેંગલુરુ વરસાદથી સૌથી વધુ પ્રભાવિત થયું હતું કારણ કે યેલાહંકા અને તેની આસપાસના ઘણા વિસ્તારોમાં પાણી ભરાઈ ગયા હતા. યેલાહંકાનું કેન્દ્રીય વિહાર કમર સુધી પાણીમાં છે. બચાવકર્મીઓએ બોટની મદદથી લોકોને બહાર કાઢ્યા હતા.
પાણી ભરાવાને કારણે જનજીવન ખોરવાઈ ગયું છે
ઉત્તર બેંગલુરુમાં પાણી ભરાવાને કારણે જનજીવન અસ્તવ્યસ્ત થઈ ગયું છે. લોકો તેમના ઘરોમાંથી બહાર નીકળી શકતા નથી, ઘણા મુસાફરો તેમની ફ્લાઇટ્સ, ટ્રેન અને બસ ચૂકી ગયા હતા. પાણી ભરાયેલા વિસ્તારોમાં બાળકો શાળાએ જઈ શકતા નથી. નીચાણવાળા વિસ્તારોમાં અનેક ઘરોમાં પાણી ઘુસી ગયા છે અને નજીકના સરોવરોમાં પાણીની આવક વધી છે. વાહનો અને ઇલેક્ટ્રિકલ સાધનોને નુકસાન થયું છે.
ભારે વરસાદ ચાલુ રહેશે
હવામાન વિભાગના જણાવ્યા અનુસાર કર્ણાટક અને તમિલનાડુમાં આગામી કેટલાક દિવસો સુધી ભારે વરસાદ ચાલુ રહેશે. કર્ણાટકની કોંગ્રેસ સરકારની વરસાદની પરિસ્થિતિને સંભાળવાને લઈને કેન્દ્રીય મંત્રી એચડી કુમારસ્વામીએ કહ્યું કે બેંગલુરુ સિંગાપુર નહીં પરંતુ વેનિસ છે, જેને તેમણે બદલવાનું વચન આપ્યું હતું. વેનિસ એ ઇટાલીનું એક શહેર છે, જ્યાં પરિવહન માટે પુલ અને જળમાર્ગોનો ઉપયોગ થાય છે. અહીં કોઈ રસ્તા નથી, લોકો એક જગ્યાએથી બીજી જગ્યાએ જવા માટે બોટ દ્વારા જાય છે.
તમિલનાડુમાં પણ ભારે વરસાદ, હવામાન વિભાગની ચેતવણી જારી
તમિલનાડુના ઘણા વિસ્તારોમાં સતત વરસાદ પડી રહ્યો છે. રામેશ્વરમમાં ભારે વરસાદને કારણે શહેરના રસ્તાઓ પર પાણી ભરાઈ ગયા છે. હવામાન વિભાગે રાજ્યમાં ભારે વરસાદની ચેતવણી જારી કરી છે. તમિલનાડુના અનેક જિલ્લાઓમાં ભારે વરસાદની સંભાવના છે. આ સિવાય કર્ણાટક, કેરળ, રાયલસીમા, આંદામાન અને નિકોબાર ટાપુઓ અને ગંગા બંગાળ સહિત અન્ય રાજ્યોમાં પણ ભારે વરસાદની આગાહી કરવામાં આવી છે.
આ પણ વાંચો – બીજેપીને ડિસેમ્બરમાં મળી શકે છે નવો અધ્યક્ષ, યાદીમાં જોડાયેલા છે આ દિગ્ગજોના નામ
