ભાજપ કોર કમિટીની બેઠકમાં દેવેન્દ્ર ફડણવીસના નામને મંજૂરી આપવામાં આવી છે. આ પછી, બીજેપી વિધાયક દળની બેઠકમાં પાર્ટીના નેતાઓ ચંદ્રકાંત પાટીલ અને સુધીર મુનગંટીવારે તેમના નામનો પ્રસ્તાવ મૂક્યો. આના પર તમામ ધારાસભ્યોએ સર્વસંમતિથી તેમને તેમના નેતા તરીકે ચૂંટ્યા.
કેન્દ્રીય નિરીક્ષકોની હાજરીમાં મહારાષ્ટ્ર વિધાનસભા ભવન ખાતે ધારાસભ્ય દળની બેઠક યોજાઈ હતી. શપથ ગ્રહણ સમારોહ 5 ડિસેમ્બરે દક્ષિણ મુંબઈના આઝાદ મેદાનમાં સાંજે 5 વાગ્યે યોજાઈ રહ્યો છે. દેવેન્દ્ર ફડણવીસ વડા પ્રધાન નરેન્દ્ર મોદી, અનેક કેન્દ્રીય પ્રધાનો અને NDA શાસિત રાજ્યોના મુખ્ય પ્રધાનોની હાજરીમાં ત્રીજી વખત મુખ્ય પ્રધાન તરીકે શપથ લેશે.
કોર કમિટીની બેઠકમાં મહારાષ્ટ્ર બીજેપી અધ્યક્ષ ચંદ્રશેખર બાવનકુલેએ કહ્યું કે દેવેન્દ્ર ફડણવીસના નેતૃત્વમાં પાર્ટીની જીત થઈ છે. બધાએ સાથે મળીને ચૂંટણી લડી. જનતાએ ખુલ્લેઆમ મતદાન કર્યું.
દેવેન્દ્ર ફડણવીસ ત્રીજી વખત મુખ્યમંત્રી તરીકે શપથ લેશે. દેવેન્દ્ર 2014માં પહેલીવાર મુખ્યમંત્રી બન્યા હતા. તેમણે તેમનો પાંચ વર્ષનો કાર્યકાળ પૂર્ણ કર્યો હતો. જોકે, 2019માં તેઓ માત્ર 80 કલાક સુધી જ મુખ્યમંત્રીની ખુરશી પર રહ્યા હતા. જોકે, બાદમાં ફડણવીસે એકનાથ શિંદેની સરકારમાં ડેપ્યુટી સીએમની ભૂમિકા પણ ભજવી છે.
સુધીર મુનગંટીવારે શું કહ્યું?
મહારાષ્ટ્ર વિધાન ભવનમાં વિધાયક દળની બેઠકમાં હાજરી આપવા આવેલા બીજેપી નેતા સુધીર મુનગંટીવારે કહ્યું કે તમામ ધારાસભ્યો વિધાયક દળના નેતાની પસંદગી કરવા માટે એકઠા થયા છે. મહારાષ્ટ્રના પૂર્વ મુખ્યમંત્રી અને ભાજપના નેતા અશોક ચવ્હાણે કહ્યું કે તેમાં કોઈ શંકા નથી કે મુખ્યમંત્રી પદ માટે દેવેન્દ્ર ફડણવીસનું નામ છે.
