ભારતીય ટીમમાંથી લાંબા સમયથી બહાર રહેલા વિકેટકીપર બેટ્સમેન ઈશાન કિશન વાપસી કરી શકે છે. આ વર્ષની શરૂઆતમાં બીસીસીઆઈના સેન્ટ્રલ કોન્ટેક્ટમાંથી બહાર કરાયેલા ઈશાન કિશનના ઈન્ડિયા A ટીમમાં વાપસીની પ્રબળ શક્યતા છે. ઓસ્ટ્રેલિયા-A સામેની બે ચાર દિવસીય ટેસ્ટ મેચ માટે તેને ભારત-A ટીમમાં સ્થાન મળી શકે છે.
તે જાણીતું છે કે ઇશાન કિશનને BCCI દ્વારા સ્થાનિક ક્રિકેટ કરતાં IPLને પ્રાથમિકતા આપવા બદલ કેન્દ્રીય કરારમાંથી બહાર કરી દેવામાં આવ્યો હતો. આ સિવાય તેને ઘણી ટીકાઓનો પણ સામનો કરવો પડ્યો હતો. BCCI સેક્રેટરી જય શાહે પણ ઠપકો આપ્યો હતો કે રાષ્ટ્રીય ટીમમાં સ્થાન મેળવવા માટે ક્રિકેટરોએ સ્થાનિક ક્રિકેટમાં ભાગ લેવો પડશે.
ડોમેસ્ટિક ક્રિકેટમાં દમદાર સદી ફટકારી
જો કે હવે ઈશાન કિશન ઘરેલુ ક્રિકેટમાં પરત ફર્યો છે. ગત સિઝનમાં રણજી ટ્રોફીથી દૂર રહ્યા બાદ આ વર્ષે દુલીપ ટ્રોફી હવે રણજી ટ્રોફીનો ભાગ છે. ઈશાન કિશનને ઝારખંડ ટીમનો કેપ્ટન બનાવવામાં આવ્યો છે. ઝારખંડ તરફથી રમતા ઈશાન કિશને રેલવે સામે શાનદાર સદી ફટકારી છે.
હવે એવા સમાચાર છે કે તે ઓસ્ટ્રેલિયા-A સામેની બે ચાર-દિવસીય ટેસ્ટ મેચ અને સિનિયર ટીમ સાથે ઇન્ટ્રા-સ્કવોડ પ્રેક્ટિસ મેચ માટે ભારત-A ટીમનો ભાગ બની શકે છે. આ માટે પસંદગીકારો તેને ઓસ્ટ્રેલિયા પ્રવાસ પર મોકલી શકે છે. ઘણા યુવા ખેલાડીઓને ટીમમાં તક મળી શકે છે.
આ પ્રવાસ 31 ઓક્ટોબરથી શરૂ થશે
ઓસ્ટ્રેલિયા A વિરૂદ્ધ બે ટેસ્ટ 31 ઓક્ટોબરથી 3 નવેમ્બર અને ત્યારબાદ 7 થી 10 નવેમ્બર સુધી રમાશે. જો કે BCCIએ હજુ સુધી ટીમની જાહેરાત કરી નથી, પરંતુ રુતુરાજ ગાયકવાડ અથવા અભિમન્યુ ઇશ્વરને ટીમનો કેપ્ટન બનાવવામાં આવી શકે છે. ઇશ્વરને છેલ્લી ચાર ફર્સ્ટ ક્લાસ મેચમાં ચાર સદી ફટકારી છે. આ સાથે જ રુતુરાજ ગાયકવાડ માટે ઘરેલુ ક્રિકેટ પણ શાનદાર રહ્યું છે.
ઓસ્ટ્રેલિયા-A સામે ભારત-A ની સંભવિત ટીમ:- રુતુરાજ ગાયકવાડ, અભિમન્યુ ઇશ્વરન, દેવદત્ત પડિકલ, સાઇ સુદર્શન, બી ઇન્દરજીત, અભિષેક પોરેલ (વિકેટકીપર), ઇશાન કિશન (વિકેટકીપર), મુકેશ કુમાર, રિકી ભુઇ, નીતિશ કુમાર રેડ્ડી, માનવ સુથાર, નવદીપ સૈની, ખલીલ અહેમદ, તનુષ કોટિયન, યશ દયાલ
