શુક્રવારે (૧૪ માર્ચ) પાકિસ્તાન સેનાએ માહિતી આપી હતી કે બલુચિસ્તાનમાં ટ્રેન પર હુમલો કરનારા બલુચિસ્તાન લિબરેશન આર્મી (BLA) ના આતંકવાદીઓએ ૨૬ બંધકોને મારી નાખ્યા હતા. આમાં 18 સૈન્ય અને અર્ધલશ્કરી દળોના જવાનોનો સમાવેશ થતો હતો. ઇન્ટર-સર્વિસિસ પબ્લિક રિલેશન્સ (ISPR) ના ડિરેક્ટર જનરલ લેફ્ટનન્ટ જનરલ અહેમદ શરીફ ચૌધરીએ બલુચિસ્તાનના મુખ્યમંત્રી સરફરાઝ બુગતી સાથે એક પ્રેસ કોન્ફરન્સમાં આ માહિતી આપી.
ચૌધરીના જણાવ્યા મુજબ, આતંકવાદીઓએ જાફર એક્સપ્રેસ પર હુમલો કર્યો હતો જેમાં 400 થી વધુ મુસાફરો હતા. હુમલા બાદ મુસાફરોને બંધક બનાવવામાં આવ્યા હતા. જવાબમાં, સુરક્ષા દળોએ એક કાર્યવાહી શરૂ કરી જે બીજા દિવસે સાંજ સુધી ચાલુ રહી. આ દરમિયાન, 33 આતંકવાદીઓ માર્યા ગયા હતા જ્યારે 300 થી વધુ મુસાફરોને સુરક્ષિત રીતે બચાવી લેવામાં આવ્યા હતા. સેનાના પ્રવક્તાએ જણાવ્યું હતું કે કુલ 354 બંધકોને બચાવી લેવામાં આવ્યા હતા, જેમાં 37 ઘાયલ મુસાફરોનો પણ સમાવેશ થાય છે. આ કાર્યવાહી દરમિયાન ફ્રન્ટિયર કોર્પ્સના પાંચ જવાનો પણ માર્યા ગયા હતા.
ભારત પર બલુચિસ્તાનમાં અશાંતિ ફેલાવવાનો આરોપ!
પાકિસ્તાની સેનાના પ્રવક્તાએ ફરી એકવાર ભારત પર બલુચિસ્તાનમાં અશાંતિ ફેલાવવાનો આરોપ લગાવ્યો. તેમણે ભારતીય નૌકાદળના ભૂતપૂર્વ અધિકારી કુલભૂષણ જાધવનો એક કથિત વીડિયો પણ બતાવ્યો જેમાં તેમણે ભારતની ગુપ્તચર એજન્સી RAW ની સંડોવણીની કબૂલાત કરી હતી. ભારતે આ અંગે કડક પ્રતિક્રિયા આપી અને કહ્યું કે પાકિસ્તાને પોતાની નિષ્ફળતાઓ માટે બીજાઓને દોષ આપવાને બદલે પોતાના આંતરિક બાબતો પર ધ્યાન કેન્દ્રિત કરવું જોઈએ. ભારતે એમ પણ કહ્યું કે આખી દુનિયા જાણે છે કે “વૈશ્વિક આતંકવાદનું કેન્દ્ર ક્યાં છે.”
પાકિસ્તાની સેનાનો દાવો – આતંકવાદીઓનો અફઘાન કનેક્શન
સેનાના પ્રવક્તાએ આ હુમલાને અફઘાનિસ્તાન સાથે જોડવાની શક્યતા પણ વ્યક્ત કરી હતી. તેમણે કહ્યું કે પાકિસ્તાનમાં અનેક કાર્યવાહીમાં માર્યા ગયેલા આતંકવાદીઓની રાષ્ટ્રીયતા અફઘાન હતી. પાકિસ્તાનના સુરક્ષા દળો હાલમાં દરરોજ લગભગ ૧૮૦ ગુપ્તચર કામગીરી કરી રહ્યા છે. ૨૦૨૪માં ૫૯,૭૭૫ મિશન હાથ ધરવામાં આવ્યા હતા, જ્યારે ૨૦૨૫માં અત્યાર સુધીમાં ૧૧,૬૫૪ મિશન હાથ ધરવામાં આવ્યા છે. પાકિસ્તાન સરકાર અને સુરક્ષા દળો સતત આતંકવાદ સામે કડક કાર્યવાહીનો દાવો કરી રહ્યા છે.
