સુરત વોર્ડમાં મૂર્તિ વિસર્જન વિવાદ: SI દેવેન દેસાઈ સામે બરતરફીની માંગણી

એસઆઇની કામગીરીના ફોટા અને વિડિઓ વોટ્સએપ ઉપર વાયરલ થયેલ છે. તે જોતા ઘણા ગંભીર સવાલો ઉભા થવા પામેલ છે. જેમ કે ફોટાઓમાં સફાઈ કામદારો દરિયા કિનારે ટેમ્પામાંથી બોક્ષ ઉતારીને દરિયા કિનારે હોડીમાં લઈ જાય છે. જે હોડી કોઈ ખાનગી વ્યક્તિની જણાય છે. જે કદાચ ભાડેથી રોકવામાં આવેલ હતી. અને પ્રાપ્ત માહિતી મુજબ ૫૬૩૦ જેટલી ખંડિત મૂર્તિઓને હજીરાના દરિયામાં વિસર્જિત કરવામાં આવી હતી. જૂની મૂર્તિઓને સુરત મહાનગરપાલિકા ધ્વારા ભેગી કરવામાં આવે છે તે એક સારી વાત છે.પરંતુ અહીં સવાલ એ ઉભો થાય છે કે, શું મહાનગરપાલિકાએ આવી કામગીરીની કોઈ નીતિ નક્કી કરી છે? આ કામગીરી માટે S.I. દેવેન દેસાઈએ તેઓના કોઈ ઉપરી અધિકારીની મંજૂરી લીધેલ છે ? આ કામગીરી દરિયામાં સફાઈ કામદારો પાસે કરાવવામાં આવી રહી છે તે વખતે ફાયર બ્રિગેડની હોડી કે ફાયર બ્રિગેડના કોઈ કર્મચારીઓ નથી કે સલામતીનાં પણ કોઈ પગલાં લેવામાં આવેલ નથી. કદાચ દરિયામાં અકસ્માત થાય અને કોઈ ઘટના બને તો તેની જવાબદારી કોની ? બીજાના જીવનને જોખમમાં મૂકવું એ ભારતીય કાયદા (IPC, હવે BNS) હેઠળ ગંભીર ગુનો છે. આ જોતા SI દેવેન દેસાઈ એ જાતે નક્કી કરીને પોતાની વાહવાહી મેળવવા આ કામ કરેલ છે. તેઓના ઉપરી અધિકારીઓએ પણ આ ફોટા અને વીડિયો જોયા હશે, તો તેઓએ કોઈ પગલા લીધા કે નહીં ? જેથી આ ઘટનાની તાકીદે ગંભીરતાપૂર્વક તપાસ કરાવવા માટે અખિલ ભારતીય સફાઈ કામદાર સંગઠનની માંગણી છે.

વધુમાં તપાસ દરમ્યાન SI દેવેન દેસાઈ દ્વારા દખલગીરી નહીં કરવામાં આવે તે માટે તેઓને તાત્કાલિક ધોરણે ફરજ માંથી બરતરફ કરવામાં આવે તેવી માંગણી છે.જો તેઓની માંગણી મુજબના પગલા નહીં લેવામાં આવે તો આવનારા દિવસોમાં સફાઈ કામદારો પાસે આવી કામગીરી કરાવવામાં નહીં આવે તેની તમામ ખાતાઓએ નોંધ લેવા અને ચાલુ ફરજ દરમ્યાન કર્મચારીઓના આરોગ્યને નુકશાન થાય કે કામદારોના જીવને જોખમમાં મૂકીને કામગીરી નહીં કરાવવામાં આવે તેવી સૂચના આપવા માટે પણ મ્યુ.કમિશ્નરને લેખિત માંગણી કરેલ છે.