CCTV ના છેડા કાપી કર્યો હાથફેરો બોપલના ગોડાઉનમાંથી ૧૮.૭૨ લાખના ઇલેક્ટ્રિક વાયરની ચોરી સાઇટ પર કામકાજ માટે ઉતાર્યો હતો ૫૦ લાખનો માલ અમદાવાદના બોપલ વિસ્તારમાં આવેલી એક નિર્માણાધીન સાઇટના ગોડાઉનમાંથી લાખો રૂપિયાની કિંમતના ઇલેક્ટ્રિક કોપર વાયરની ચોરી થવાનો મોટો બનાવ સામે આવ્યો છે. અજાણ્યા તસ્કરોએ સીસીટીવી કેમેરાના વાયર કાપી નાખીને પૂર્વઆયોજિત કાવતરાના ભાગરૂપે આશરે રૂપિયા ૧૮,૭૨,૯૯૦ની કિંમતના કોપર વાયરના ૧૪૭ બંડલ ચોરી લીધા છે. આ અંગે પોલીસે ગુનો નોંધીને તસ્કરોને ઝડપી પાડવા કાર્યવાહી હાથ ધરી છે.
આ ચોરી અંગે ચાંદખેડામાં રહેતા અને ઇલેક્ટ્રિકલ કોન્ટ્રાક્ટર તરીકે કામ કરતા અમિતકુમાર સવજીભાઈ પટેલે પોલીસ ફરિયાદ નોંધાવી છે. તેઓ બોપલમાં ડી.પી.એસ. સ્કૂલ રોડ પર આવેલી નિર્માણાધીન સાઇટ પર ઇલેક્ટ્રિકલ વાયરિંગનું કોન્ટ્રાક્ટનું કામ કરે છે.
ગત ફેબ્રુઆરી મહિનામાં કોપર વાયરના ભાવમાં સતત વધારો થતો હોવાથી તેમણે ડેવલપર દ્વારા મળેલા ફ્લેટ નંબર એ/૧૦૪ના ગોડાઉનમાં અંદાજે ૫૦ લાખ રૂપિયાનો ઇલેક્ટ્રિકલ કોપર વાયરનો સ્ટોક ઉતાર્યો હતો. આ માલમાંથી આશરે ૧૫ લાખ રૂપિયાના વાયરનો વપરાશ થઈ ચૂક્યો હતો અને બાકીનો માલ ગોડાઉનમાં સુરક્ષિત રાખવામાં આવ્યો હતો, જ્યાં તસ્કરોએ નિશાન બનાવ્યું હતું.
ગત તારીખ ૧૩ માર્ચ, ૨૦૨૬ના રોજ સાંજના સાડા છ વાગ્યાની આસપાસ કોન્ટ્રાક્ટર અમિતકુમાર ગોડાઉનને તાળું મારીને પોતાના ઘરે ગયા હતા. ત્યારબાદ અમુક કલરના વાયરની ઘટ પડતા જૂના માલની ગણતરી કરવા માટે ૧૬ માર્ચ, ૨૦૨૬ના રોજ સવારે દસેક વાગ્યે તેઓ સાઇટ પર પહોંચ્યા ત્યારે ચોરીનો ખુલાસો થયો હતો.
આ પછી તેઓએ તપાસ કરતાં જાણવા મળ્યું હતું કે, અજાણ્યા શખસે ૧૩મી તારીખની સાંજથી ૧૬મી તારીખની સવાર વચ્ચેના સમયે ગોડાઉનમાં પ્રવેશ કર્યો હતો.
ચોરે ડ્રોઇંગ રૂમમાંથી સ્ટોક રૂમમાં જતા CCTV કેમેરાનો વાયર કાપી નાખ્યો હતો અને ત્યારબાદ અલગ-અલગ કલરના કુલ ૧૪૭ કોપર વાયરના બંડલની ચોરી કરી ત્યાંથી ફરાર થઈ ગયા હતા. ચોરાયેલા માલની કુલ કિંમત ૧૮,૭૨,૯૯૦ રૂપિયા થાય છે. પોલીસે આ મામલે અજાણ્યા ચોર ઇસમો વિરુદ્ધ કાયદેસરની કાર્યવાહી હાથ ધરી છે.
