એક, બે નહીં ૧૬ બોગસ ડોક્ટર ઝડપાયા સુરતના પાંડેસરામાં SOG અને આરોગ્ય વિભાગનો દરોડો ઝડપાયેલા આરોપીઓ અગાઉ હોસ્પિટલોમાં કમ્પાઉન્ડર અથવા ડોક્ટરના હેલ્પર તરીકે કામ કરતા હતા સુરતના પાંડેસરા વિસ્તારમાં લોકોના સ્વાસ્થ્ય સાથે ચેડાં કરનારા ૧૬ બોગસ ડોક્ટરો ઝડપાયા છે. સ્પેશિયલ ઓપરેશન ગ્રુપ (SOG) અને આરોગ્ય વિભાગ દ્વારા સંયુક્ત રીતે દરોડા પાડીને આ કાર્યવાહી કરવામાં આવી હતી. આ દરોડા દરમિયાન ૧૬ બોગસ ડોક્ટરોને પકડી પાડવામાં આવ્યા હતા, જેમની સામે પાંડેસરા પોલીસ સ્ટેશનમાં ગુનો દાખલ કરવામાં આવ્યો છે.
ઝડપાયેલા આરોપીઓ અગાઉ હોસ્પિટલોમાં કમ્પાઉન્ડર અથવા ડોક્ટરના હેલ્પર તરીકે કામ કરતા હતા. તેમની શૈક્ષણિક લાયકાત મોટે ભાગે બીએસસી, બીએ, અથવા ૧૦મા-૧૨મા ધોરણ પાસ જેટલી જ છે.
આ બોગસ ડોક્ટરો બિહાર અને પશ્ચિમ બંગાળ જેવા રાજ્યોમાં પણ પ્રેક્ટિસ કરીને આવ્યા હતા. સુરતમાં તેઓ મુખ્યત્વે લેબર કોલોની અને લેબર વિસ્તારોમાં પોતાની બોગસ પ્રેક્ટિસ ચલાવતા હતા. આ આરોપીઓ તાવ, મેલેરિયા અને અન્ય સામાન્ય બીમારીઓની સારવાર કરતા હતા. તેઓ એલોપેથીક દવાઓ, ઇન્જેક્શન અને સિરપ આપીને લોકોના જીવ જાેખમમાં મૂકતા હતા. દરોડા દરમિયાન તેમની પાસેથી મોટી માત્રામાં એલોપેથીક દવાઓ, ઇન્જેક્શન અને સિરપનો જથ્થો મળી આવ્યો હતો, જેને જપ્ત કરવામાં આવ્યો છે. SOG દ્વારા આવા બોગસ ડોક્ટરો પર સતત વોચ રાખીને આ મોટી સફળતા મેળવવામાં આવી છે, જે લોકોના આરોગ્યના હિતમાં મહત્વપૂર્ણ પગલું છે.
