પરિવારજનો શોધવા નીકળતા યુવક કિશોરીને મૂકી ભાગી ગયો સ્નેપચેટથી પરિચય કેળવનારા યુવકે કિશોરીને ભગાડી જઇ અડપલાં કર્યાં કિશોરીની ભાળ મળતા સરખેજ પોલીસે ગુનો નોંધી આરોપીને પકડવા તજવીજ હાથધરી શહેરના સરખેજ વિસ્તારમાં ફોઇના ઘરે રહેતી કિશોરીને સ્નેપચેટ પર એક યુવક સાથે પરિચય થયો હતો. જે બાદ બંને વચ્ચે પ્રેમ સંબંધ બંધાયો હતો અને થોડા દિવસ પહેલા યુવક લગ્નની લાલચ આપીને કિશોરીને ભગાડીને પોતાના ઘરની પાછળના ઘરમાં રાખી હતી. જ્યાં તેની સાથે અડપલાં કર્યા હતા. બીજીતરફ કિશોરીના પરિવારના સભ્યોએ દીકરીની શોધખોળ કરતા આરોપી તેને મૂકીને ભાગી ગયો હતો. કિશોરીની ભાળ મળતા સરખેજ પોલીસે ગુનો નોંધી તપાસ આરંભી છે. બોડકદેવમાં રહેતા યુવકની ૧૬ વર્ષીય પુત્રી સરખેજ ધોળકા રોડ પર આવેલા ફોઇના ઘરે રહે છે. ગત તા.૨૮ માર્ચે યુવકની પુત્રી ઘરેથી ગાયબ હતી.
જેથી યુવક સહિતના લોકોએ શોધખોળ કરવા છતાં તેની ભાળ મળી નહોતી. પરંતુ કિશોરી એક વર્ષ પહેલા ગાંધીનગરના શખ્સ સાથે ભાગી ગઇ હોવાથી ત્યાં તપાસ કરતા તે શખ્સ પણ ગાયબ હતો. જેથી આ મામલે સરખેજ પોલીસને જાણ કરાતા પોલીસે તપાસ હાથ ધરતા કિશોરીની ભાળ મળી હતી. તેની પૂછપરછમાં સામે આવ્યું કે તેને ભાવેશ નામના યુવક સાથે સ્નેપચેટથી સંપર્ક થયો હતો. જે બાદ બંને વાતચીત કરતા હતા અને ત્યારે એકબીજા સાથે પ્રેમ સંબંધ બંધાયો હતો. કિશોરી ભાવેશને મળવા ગઇ ત્યારે લગ્નની લાલચ આપીને સરખેજ રેલવે સ્ટેશન પાસેથી તેના ઘરે લઇ ગયો હતો. ત્યાં પાછળ આવેલા બીજા ઘરમાં કિશોરીને રાખી હતી અને ત્યાં અડપલાં પણ કર્યા હતા. કિશોરીના પરિવારના સભ્યો શોધવા નીકળ્યા હોવાની જાણ થતાં ભાવેશ કિશોરીને મૂકીને ભાગી ગયો હતો. સરખેજ પોલીસે ગુનો નોંધી આરોપીને શોધવા તજવીજ હાથ ધરી છે.
