૧૭ વર્ષની સગીરા સાથે છેડતીનો આરોપ.કેન્દ્રીય મંત્રી બંડી સંજયના પુત્ર ભગીરથ સામે POCSO હેઠળ ગુનો.સગીરાની માતાએ ફરિયાદ કરી છે કે, ભગીરથ છેલ્લા છ મહિનાથી તેમની પુત્રીને હેરાન કરી રહ્યો હતો.
હૈદરાબાદ અને કરીમનગરમાં કેન્દ્રીય મંત્રી બંડી સંજય કુમારના પુત્ર બંડી ભગીરથ સાથે જાેડાયેલા બે અલગ-અલગ પોલીસ કેસોએ રાજકીય અને સામાજિક વર્તુળોમાં ભારે ચર્ચા જગાવી છે. આ મામલે સામસામે ગંભીર આક્ષેપો સાથે ફરિયાદો નોંધવામાં આવી છે. કોંગ્રેસે સમગ્ર મામલે ભાજપ સરકાર પર આકરા પ્રહારો કર્યા છે.
હૈદરાબાદના પેટ બશીરાબાદ પોલીસ સ્ટેશનમાં બંડી ભગીરથ વિરુદ્ધ POCSO એક્ટ અને ભારતીય ન્યાય સંહિતા (BNS) ની કલમો હેઠળ ગુનો નોંધવામાં આવ્યો છે. એક ૧૭ વર્ષીય સગીરાની માતાએ ફરિયાદ કરી છે કે, ભગીરથ છેલ્લા છ મહિનાથી તેમની પુત્રીને હેરાન કરી રહ્યો હતો. ફરિયાદ મુજબ, ભગીરથે લગ્નનું ખોટું વચન આપી સગીરા સાથે મિત્રતા કેળવી હતી અને મોઈનાબાદના એક ફાર્મહાઉસમાં તેની સાથે ગેરવર્તણૂક કરી જાતીય પજવણી કરી હતી.
બીજી તરફ, આ જ દિવસે કરીમનગર II ટાઉન પોલીસ મથકે ભગીરથની ફરિયાદના આધારે સગીરા અને તેના માતા-પિતા વિરુદ્ધ પણ કેસ દાખલ કર્યો છે. ભગીરથનો દાવો છે કે, આ પરિવારે તેને હની ટ્રેપમાં ફસાવવાનો પ્રયાસ કર્યો છે. ભગીરથે આક્ષેપ કર્યો છે કે, લગ્નનો ઈનકાર કરતા યુવતીના પરિવારજનોએ ખોટો કેસ ન કરવાની શરતે તેની પાસે ૫ કરોડ રૂપિયાની માંગણી કરી હતી. ભગીરથના જણાવ્યા અનુસાર, ડરના કારણે તેણે અગાઉ ૫૦,૦૦૦ હજાર રૂપિયા આપ્યા હતા, પરંતુ હવે તે પરિવાર ૫ કરોડની માંગ કરી રહ્યો છે અને તેણે આપવાનો ઇન્કાર કર્યા બાદ યુવતી આત્મહત્યાની ધમકી સાથે પોક્સો અંતર્ગત કેસદાખલ કરાવ્યો છે. પેટ બશીરાબાદ પોલીસે POCSO એક્ટની કલમ ૧૧ (જાતીય પજવણી) અને BNS ની સંબંધિત કલમો હેઠળ કેસ નોંધ્યો છે. કરીમનગર પોલીસે સગીરા અને તેના માતા-પિતા વિરુદ્ધ ખંડણી (Extortion), ગુનાહિત ધમકી અને ગુનાહિત કાવતરા હેઠળ ગુનો નોંધી તપાસ હાથ ધરી છે. કેન્દ્રીય મંત્રીના પુત્ર સાથે જાેડાયેલો આ હાઈ-પ્રોફાઈલ મામલો અત્યારે અત્યંત સંવેદનશીલ બની ગયો છે અને પોલીસ બંને પક્ષોની તપાસ કરી રહી છે.
