Dinesh Vaghela: આમ આદમી પાર્ટી (AAP)ના સ્થાપક સભ્ય દિનેશ વાઘેલાનું લાંબી માંદગી બાદ ગોવામાં નિધન થયું છે. આમ આદમી પાર્ટીના નેતાએ મંગળવારે આ જાણકારી આપી.
દિનેશ વાઘેલાએ 73 વર્ષની વયે અંતિમ શ્વાસ લીધા હતા
AAP ગોવાના ઉપાધ્યક્ષ વાલ્મિકી નાઈકે દિનેશ વાઘેલાના નિધન અંગે માહિતી આપી હતી. તેમણે જણાવ્યું કે, 73 વર્ષીય દિનેશ વાઘેલાનું સોમવારે રાત્રે પણજીમાં તેમના નિવાસસ્થાને અવસાન થયું હતું.
વાઘેલા AAPની રાષ્ટ્રીય કાર્યકારિણીના સભ્ય હતા
AAPની સત્તાવાર વેબસાઈટ મુજબ, દિનેશ વાઘેલા આમ આદમી પાર્ટીની રાષ્ટ્રીય કાર્યકારિણીના સભ્ય હતા અને ઈન્ડિયા અગેઈન્સ્ટ કરપ્શન ચળવળ પછી પાર્ટીમાં જોડાનારા સભ્યોમાંના એક હતા.
સેન્ટ ઈનેઝ સ્મશાનગૃહમાં અંતિમ સંસ્કાર થશે.
દિનેશ વાઘેલા મૂળ ગુજરાતના હતા અને ગોવામાં રહેતા હતા. AAPની વેબસાઈટ અનુસાર, તેઓ AAPની અનુશાસન સમિતિના વડા હતા. નાઈકે કહ્યું કે વાઘેલાના અંતિમ સંસ્કાર પણજી નજીક સેન્ટ ઈનેઝ સ્મશાનગૃહમાં કરવામાં આવશે.
